பாக்சிங் டே டெஸ்ட் - பாட் கம்மின்ஸ் அபார பந்துவீச்சில் சிக்கி நியூசிலாந்து 148 ரன்னில் ஆல் அவுட்

மெல்போர்ன்:

ஆஸ்திரேலியா - நியூசிலாந்து அணிகளுக்கு இடையிலான 2-வது டெஸ்ட் மெல்போர்னில் நேற்று முன்தினம் தொடங்கியது. ‘பாக்சிங் டே’ டெஸ்டான இதில் நியூசிலாந்து டாஸ் வென்று பந்துவீச்சை தேர்வு செய்தது.

டிராவிஸ் ஹெட் 114 ரன்னிலும், ஸ்டீவ் ஸமித் 85 ரன்னிலும், டிம் பெய்ன் 79 ரன்னிலும், மார்னஸ் லாபஸ்சாக்னே 63 ரன்னிலும் அவுட்டாகினர். இறுதியில், ஆஸ்திரேலியா அணி முதல் இன்னிங்சில் 155.1 ஓவரில் 467 ரன்கள் சேர்த்து ஆல்அவுட் ஆனது.

நியூசிலாந்து அணி சார்பில் நீல் வாக்னர் 4 விக்கெட்டும், டிம் சவுத்தி 3 விக்கெட்டும், கிராண்ட்ஹோம் 2 விக்கெட்டும் வீழ்த்தினர்.

அதன்பின், நியூசிலாந்து முதல் இன்னிங்சை தொடங்கியது. ஆஸ்திரேலிய வீரர்களின் அபார பந்து வீச்சில் சிக்கி நியூசிலாந்து வீரர்கள் திணறினர்.

நியூசிலாந்து அணியின் டாம் லாதம் மட்டும் ஓரளவு தாக்குப்பிடித்து அரை சதம் அடித்தார். அவர் 50 ரன்னில் ஆட்டமிழந்தார்.

மற்றவர்கள் விரைவில் வெளியேறினர். இதனால் நியூசிலாந்து அணி 54.5 ஓவரில் 148 ரன்னில் ஆல் அவுட்டானது. 

ஆஸ்திரேலியா சார்பில் பாட் கம்மின்ஸ் 5 விக்கெட்டும், ஜேம்ஸ் பாட்டின்சன் 3 விக்கெட்டும், மிட்செல் ஸ்டார்க் 2 விக்கெட்டும் வீழ்த்தினர்.

இதையடுத்து, 319 ரன் முன்னிலை பெற்ற ஆஸ்திரேலியா இரண்டாவது இன்னிங்சை தொடர்ந்து ஆடியது.

மூன்றாம் நாள் ஆட்ட முடிவில் ஆஸ்திரேலியா அணி 4 விக்கெட் இழப்புக்கு 137 ரன்கள் எடுத்துள்ளது. மேத்யூ வேட் 15 ரன்னுடனும், டிராவிஸ் ஹெட் 12 ரன்னுடனும் ஆட்டமிழக்காமல் உள்ளனர்.

 

இன்னும் 2 நாள் ஆட்டம் மீதமுள்ள நிலையில், 456 ரன்கள் முன்னிலை பெற்றுள்ள ஆஸ்திரேலியா வெற்றி பெறும் என எதிர்பார்க்கப்படுகிறது.