டி20: மேக்ஸ்வெல், கிறிஸ் லின் ஆட்டத்தால் நியூசிலாந்தை வீழ்த்தியது ஆஸ்திரேலியா

ஆஸ்திரேலியா, நியூசிலாந்து மற்றும் இங்கிலாந்து அணிகளுக்கு இடையிலான முத்தரப்பு டி20 கிரிக்கெட் தொடர் இன்று தொடங்கியது. சிட்னியில் நடைபெற்ற முதல் ஆட்டத்தில் ஆஸ்திரேலியா- நியூசிலாந்து அணிகள் பலப்பரீட்சை நடத்தின.

டாஸ் வென்ற ஆஸ்திரேலியா பீல்டிங் தேர்வு செய்தது. அதன்படி நியூசிலாந்தின் மார்ட்டின் கப்தில், கொலின் முன்றோ ஆகியோர் தொடக்க வீரர்களாக களம் இறங்கினார்கள்.

மார்ட்டின் கப்தில் 5 ரன்னிலும், முன்றோ 3 ரன்ன்னிலும் ஸ்டேன்லேக் பந்தில் ஆட்டமிழந்தார். அதன்பின் வந்த கேப்டன் கேன் வில்லியம்சனை 8 ரன்னில் டை வெளியேற்ற, ப்ரூஸ்-ஐ 3 ரன்னில் வெளியேற்றினார் ஸ்டேன்லேக் இதனால் 34 ரன்னுக்குள் நியூசிலாந்து முக்கிய நான்கு விக்கெட்டுக்களை இழந்தது.

அதன்பின் வந்த ராஸ் டெய்லர் 24 ரன்னும், பிளன்டெல் 14 ரன்னும், கிராண்ட்ஹோம் அவுட்டாகாமல் 38 ரன்களும் சேர்க்க நியூசிலாந்து 20 ஓவரில் 9 விக்கெட் இழப்பிற்கு 117 ரன்கள் சேர்த்தது.

ஆஸ்திரேலியா பேட்டிங் செய்ய தயாராகும்போது மழை பெய்தது. ஆட்டம் பாதிக்கப்பட்டதால், டக்வொர்த் லீவிஸ் விதிப்படி ஆஸ்திரேலியா அணியின் வெற்றிக்கு 15 ஓவரில் 95 ரன்கள் இலக்காக நிர்ணயிக்கப்பட்டது.

90 பந்தில் 95 ரன்கள் எடுத்தால் வெற்றி என்ற இலக்குடன் வார்னர், டி'ஆர்கி ஷார்ட் தொடக்க வீரர்களாக களம் இறங்கினார்கள். ஷார்ட் 4 ரன்னிலும், வார்னர் 6 ரன்னிலும் ஆட்டமிழந்தனர்.



அதன்பின் 3-வது விக்கெட்டுக்கு கிறிஸ் லின் உடன் மேக்ஸ்வெல் ஜோடி சேர்ந்தார். இந்த ஜோடி அதிரடியாக விளையாடி அணியை வெற்றி நோக்கி அழைத்துச் சென்றனர். ஆஸ்திரேலியா 11 ஒவரில் 87 ரன்கள் எடுத்திருக்கும் போது கிறிஸ் லின் 33 பந்தில் 44 ரன்கள் எடுத்து ஆட்டமிழந்தார். அடுத்து கேரி களம் இறங்கினார்.

12-வது ஓவரில் மேக்ஸ்வெல் இரண்டு பவுண்டரி அடிக்க ஆஸ்திரேலியா 11.3 ஓவரில் 3 விக்கெட் இழப்பிற்கு 96 ரன்கள் எடுத்து 7 விக்கெட் வித்தியாசத்தில் வெற்றி பெற்றது. மேக்ஸ்வெல் 24 பந்தில் 5 பவுண்டரி, 1 சிக்சருடன் 40 ரன்கள் சேர்த்தார்.

ஆஸ்திரேலியா - இங்கிலாந்து இடையிலான போட்டி வருகிற 7-ந்தேதி ஹோபர்ட்டில் நடக்கிறது.