ஆஸ்திரேலிய ஓபன்: 2-வது சுற்றில் முன்னணி வீராங்கனை ரட்வன்ஸ்கா அதிர்ச்சி தோல்வி

ஆண்டின் முதல் கிராண்ட்ஸ்லாம் தொடரான ஆஸ்திரேலியா ஓபன் டென்னிஸ் தொடர் மெல்போர்ன் நகரில் நடைபெற்று வருகிறது. இந்த தொடருக்கான 3-ம் நிலை வீராங்கனையான அக்னிஸ்கா ரட்வன்ஸ்கா 2-வது சுற்றில் குரோசியாவின் மிர்ஜனா லூசிக்-பரோனியை எதிர்கொண்டார்.

இதில் உலகத் தரவரிசையில் 79-வது இடத்தில் இருக்கும் லூசிக்- பரோனி ரட்வன்ஸ்காவிற்கு அதிர்ச்சி வைத்தியம் அளித்தார். அவர் ரட்வன்ஸ்காவை 6-3, 6-2 என நேர்செட் கணக்கில் வீழ்த்தி 3-வது சுற்றுக்கு முன்னேறினார். இந்த தொடரில் முன்னிலை வீராங்கனை ஒருவர் முதன்முறையாக தொடரில் இருந்து வெளியேறியுள்ளார்.

கடந்த வருடம் நடைபெற்ற ஆஸ்திரேலிய ஓபன் தொடரில் அரையிறுதி வரை முன்னேறியவர் ரட்வன்ஸ்கா. விம்பிள்டன் தொடரில் இறுதிப் போட்டி வரை முன்னேறியவர் என்பது குறிப்பிடத்தக்கது.