800 மீட்டர் ஓட்டப் பந்தயம்: தகுதிச் சுற்றில் ஜின்சன் ஜான்சன் தோல்வி

ரியோ ஒலிம்பிக்கில் தடகள போட்டிகள் இன்று தொடங்கியது. முதலில் 800 மீட்டர் ஓட்டத்திற்கான தகுதிச் சுற்று நடைபெற்றது. மொத்தம் 5 பிரிவுகளாக (ஹீட்) வீரர்கள் பிரிக்கப்பட்டு தகுதிச் சுற்று நடைபெற்றது.

இந்திய வீரர் ஜின்சன் ஜான்சன் 3-வது பிரிவில் இடம்பிடித்திருந்தார். இவருடன் மேலும் 8 வீரர்கள் இடம்பிடித்தனர். விசில் அடித்ததும் வீரர்கள் சீறிப்பாய்ந்தார்கள். இறுதியில் ஜான்சனால் 5-வது இடத்தையே பிடிக்க முடிந்தது. முதல் மூன்று இடங்களை பிடிக்கும் வீரர்கள்தான் அரையிறுதிக்கு முன்னேற முடியும் என்பதால் ஜான்சனின் ஒலிம்பிக் பதக்கம் கனவு தகர்ந்தது.

கென்யா வீரர் லெகுடா ருடிஷா பந்தய தூரத்தை ஒரு நிமிடம் 45:09 வினாடிகளில் கடந்து முதல் இடத்தை பிடித்தார். தென்ஆப்பிரிக்க வீரர் ரைனார்ட் வான் ரென்ஸ்பர்க் ஒரு நிமிடம் 45:67 வினாடிகளில் கடந்து 2-வது இடத்தையும், பிரிட்டன் வீரர் மைக்கேல் ரிம்மெர் ஒரு நிமிடம் 45:99 வினாடிகளில் கடந்து 3-வது இடத்தையும் பிடித்தனர். இந்த மூன்று பேரும் அரையிறுதிக்கு முன்னேறினார்கள்.

அமெரிக்க வீரர் கிளெய்டன் மர்ஃபி ஒரு நிமிடம் 46:18 வினாடிகளில் கடந்து 4-வது இடத்தையும், இந்திய வீரர் ஜான்சன் ஒரு நிமிடம் 47:27 வினாடிகளில் கடந்து ஐந்தாவது இடத்தையும் பிடித்தனர்.