உடுமலையில் சிவப்பு கொய்யா பழங்களை வாங்க பொதுமக்கள் ஆர்வம்

உடுமலை:

உடுமலை பகுதியில் பழனி, ஆயக்குடி மற்றும் உடுமலை சுற்றுப்பகுதிகளில் உள்ள கிராமங்களில் இருந்து கொய்யாப்பழம் விற்பனைக்காக கொண்டு வரப்படுகிறது. உடுமலை அருகே உள்ள பொன்னாலம்மன் சோலையிலிருந்து இயற்கை முறையில் விளைவிக்கப்பட்ட சிவப்பு கொய்யா ரக பழங்களை வாங்க பொதுமக்களிடையே ஆர்வம் ஏற்பட்டுள்ளது. பொன்னாலம்மன் சோலை பகுதியில் இருந்து சைக்கிளில் கொண்டு வந்து சிவப்பு கொய்யா பழங்கள் விற்பனை செய்யப்படுகின்றன. கிலோரூ .80க்கும், வெள்ளை கொய்யாப்பழம் ரூ. 70க்கும் விற்பனை செய்கின்றனர் .

சர்க்கரை, ரத்த அழுத்த நோய்களுக்கு கொய்யாப்பழம் சிறந்தது என மருத்துவர்கள் பரிந்துரைப்பதால் கொய்யாப்பழம் வாங்குவதில் பொதுமக்கள் மத்தியில் ஆர்வம் அதிகரித்துள்ளது. உடுமலை உழவர் சந்தை பகுதியில் காலை நேரத்தில் சைக்கிளில் கொய்யாப்பழம் விற்பனை அமோகமாக நடைபெறுகிறது. தவிர டவுன் பகுதிகளில் வியாபாரிகள் ஆங்காங்கே சைக்கிளில் வைத்து வெள்ளை மற்றும் சிவப்பு நிற கொய்யா பழங்களை விற்பனை செய்கின்றனர்.