தேர்தல் பணியில் ஈடுபடும் அரசு ஊழியர்கள் 90 சதவீதம் பேருக்கு தடுப்பூசி செலுத்தும் பணி நிறைவு

நீலகிரி மாவட்டத்தில் ஊட்டி, குன்னூர், கூடலூர் ஆகிய 3 சட்டமன்ற தொகுதிகள் உள்ளன. கொரோனா பாதிப்பால் அரசின் பாதுகாப்பு வழிமுறைகளின் படி சமூக இடைவெளியை கடைபிடிப்பது, கட்டாயம் முககவசம் அணிவது, கிருமிநாசினியால் கைகளை சுத்தப்படுத்துவதை உறுதி செய்ய வேண்டும் என்று இந்திய தேர்தல் ஆணையம் அறிவுறுத்தி உள்ளது. தொற்று பரவலை தடுக்க 1,050 வாக்காளர்களுக்கு மேல் உள்ள வாக்குச்சாவடிகள் பிரிக்கப்பட்டது. தற்போது 868 வாக்குச்சாவடிகளாக அதிகரித்து உள்ளது.

இதுகுறித்து சுகாதாரத்துறை அதிகாரிகள் கூறும் போது,நீலகிரியில் தேர்தல் பணியில் ஈடுபடுபவர்களுக்கு கடந்த ஒரு வாரமாக தொடர்ந்து ஊட்டி, குன்னூர், கோத்தகிரி, மஞ்சூர், கூடலூர், பந்தலூர் உள்பட 15 மையங்கள், 7 தனியார் மருத்துவமனைகளில் கொரோனா தடுப்பூசி செலுத்தப்பட்டு வருகிறது. இதுவரை 90 சதவீதம் பேருக்கு(6 ஆயிரத்து 300 பேர்) தடுப்பூசி போடும் பணி நிறைவடைந்து உள்ளது. மீதம் உள்ளவர்கள் ரத்த அழுத்தம், சர்க்கரை நோய் மற்றும் இணை நோய் உள்ளவர்களுக்கு செலுத்தவில்லை.

தடுப்பூசி போட்டுக்கொண்டவர்களுக்கு 28 நாட்களுக்கு பின்னர் 2-வது டோஸ் செலுத்தப்பட உள்ளது. கொரோனா தடுப்பு மருந்து போதுமான அளவு இருப்பு இருக்கிறது என்றனர்.