வாக்காளர் பட்டியலில் பெயர் சேர்க்க சிறப்பு முகாம்

ஊட்டி:

நீலகிரி மாவட்ட கலெக்டர் இன்னசென்ட் திவ்யா வெளியிட்டு உள்ள செய்திக்குறிப்பில் கூறியிருப்பதாவது:-

இந்திய தேர்தல் ஆணையத்தின் அறிவுரைப்படி 1.1.2021-ந் தேதியை தகுதி நாளாக கொண்டு வாக்காளர் பட்டியல் சுருக்கமுறை திருத்த சிறப்பு முகாம் இன்று (திங்கட்கிழமை) முதல் அடுத்த மாதம் (டிசம்பர்) 15-ந் தேதி வரை அனைத்து வாக்குச்சாவடியிலும் நடைபெற உள்ளது.

இது தொடர்பாக வரைவு வாக்காளர் பட்டியல் மாவட்ட தேர்தல் அதிகாரி மூலம் நீலகிரி மாவட்ட கலெக்டர் அலுவலகத்தில் வெளியிடப்பட உள்ளது. எனவே தகுதி உடைய நபர்கள் தங்களது பெயர்களை வாக்காளர் பட்டியலில் சேர்க்க விண்ணப்பிக்கலாம். மேலும் வாக்காளர் பட்டியலில் இருந்து பெயர் நீக்குதல், திருத்தங்கள், முகவரி மாற்றம் மேற்கொள்ளுதல் போன்றவற்றுக்கும் விண்ணப்பிக்கலாம்.

ஒவ்வொரு வாக்குச்சாவடியிலும் நியமிக்கப்பட்டு உள்ள அலுவலரிடம் அனைத்து வேலை நாட்களிலும் காலை 10 மணி முதல் மாலை 5 மணி வரை வாக்காளர் பட்டியலில் பெயர் சேர்த்தல், நீக்குதல் மற்றும் திருத்தம் செய்தல் போன்றவற்றிற்கு படிவங்களை பெற்று உரிய ஆதாரங்களுடன் பூர்த்தி செய்து அடுத்த மாதம் (டிசம்பர்) 15-ந் தேதிக்குள் விண்ணப்பிக்கலாம்.

வாக்காளர் பட்டியலில் பெயர் சேர்க்க படிவம் 6-ல் பாஸ்போர்ட் அளவிலான 2 புகைப்படம், வயது மற்றும் முகவரி குறித்தான உரிய சான்றுகளுடன் விண்ணப்பிக்க வேண்டும். பெயர் நீக்கம் செய்ய படிவம் 7-ல், பிழைத்திருத்தம் ஏதேனும் இருப்பின் படிவம் 8-ல், அதே தொகுதிக்குள் முகவரி மாற்றங்கள் செய்து கொள்ள படிவம் 8ஏ ஆகியவற்றில் உரிய சான்றுகளுடன் விண்ணப்பிக்கலாம்.

மேலும் வருவாய் கோட்டாட்சியர் அலுவலகங்கள், வட்டாட்சியர் அலுவலகங்களிலும் விண்ணப்பிக்கலாம். பெயர் சேர்த்தல், நீக்குதல், திருத்தம், முகவரி மாற்றம் போன்றவற்றுக்கு ஆட்சேபனைகள் தெரிவிக்க அடுத்த மாதம் 15-ந் தேதி கடைசி நாள் ஆகும். அனைத்து திருத்தங்களுக்கு பிறகு அடுத்த ஆண்டு ஜனவரி மாதம் 20-ந் தேதி இறுதி வாக்காளர் பட்டியல் வெளியிடப்படும்.

இவ்வாறு அதில் கூறப்பட்டு உள்ளது.