கிச்சன் கில்லாடிகள்
மீல்மேக்கர் கீமா ஸ்டஃப்டு தோசை

சூப்பரான மீல்மேக்கர் கீமா ஸ்டஃப்டு தோசை

Update: 2022-03-03 09:30 GMT
சைவப் பிரியர்கள் விரும்பும் சுவையான உணவு மீல்மேக்கர். இன்று அருமையான சுவையான மீல்மேக்கர் கீமா ஸ்டஃப்டு தோசை செய்வது எப்படி என்று பார்க்கலாம்.
தேவையான பொருட்கள்

தோசை மாவு - 2 கப்,
எண்ணெய் - சிறிதளவு,
மீல்மேக்கர் - 100 கிராம்,
மஞ்சள் தூள் - 1/4 டீஸ்பூன்,
மிளகாய் தூள் - 1/2 டீஸ்பூன் (காரத்திற்கு ஏற்ப),
கரம் மசாலாத்தூள் - 1/4 டீஸ்பூன்,
எலுமிச்சை சாறு - 2 தேக்கரண்டி,
உப்பு - தேவையான அளவு.

அரைக்க…

வெங்காயம் - 1/2 (நறுக்கியது),
பூண்டு - 4 பல்,
கறிவேப்பிலை - 5 இலை,
கொத்தமல்லித்தழை - சிறிதளவு,
பச்சை மிளகாய் - 3.

செய்முறை

வெங்காயம், ப.மிளகாய், கொத்தமல்லி, பூண்டை பொடியாக நறுக்கி கொள்ளவும்.

மீல்மேக்கரை சூடான நீரில் 20 நிமிடங்கள் ஊற வைத்த பின்னர் நன்றாக கழுவி அதனை மிக்ஸியில் போட்டு மைய அரைத்துக் கொள்ளவும்.

வெங்காயத்துடன், பச்சைமிளகாய், பூண்டு, கறிவேப்பிலை, கொத்தமல்லித்தழை சேர்த்து கொரகொரப்பாக அரைத்துக் கொள்ளவும்.

கடாயில் 1 டேபிள் ஸ்பூன் எண்ணெய் ஊற்றி சூடானதும் அரைத்த விழுதினை சேர்த்து 2 நிமிடங்கள் நன்றாக வதக்கவும்.

அத்துடன் தூள் வகைகள் சேர்த்து கிளறிவிடவும்.

அதில் அரைத்த சோயா சேர்த்து கலந்து 10 நிமிடங்கள் நன்றாக வேகவிடவும்.

இது வெந்து முட்டை பொடிமாஸ் மாதிரி உதிரியாக வரும் போது இறக்கி விடவும். இப்போது மீல்மேக்கர் கீமா ரெடி.

அத்துடன் சிறிது எலுமிச்சைச் சாறு சேர்த்துக் கொள்ளவும். அதனை சிறிது நேரம் ஆறவைத்துக் கொள்ளவும்.

அடுத்து தோசைக் கல்லை அடுப்பில் வைத்து சூடானதும் அதில் மாவினை ஊற்றி சுற்றி சிறிது எண்ணெய் விட்டு வெந்ததும் திருப்பி போட்டு நன்கு வெந்தவுடன் அதில் கலந்து வைத்துள்ள கைமா கலவையினை மேலே 2 ஸ்பூன் அளவு சேர்த்து நன்றாக பரவி விடவும்.

தோசையின் மீது சிறிது எண்ணெயினை ஊற்றி 1 நிமிடம் வேகவிட்டுப் இரண்டாக மடித்து எடுத்து பரிமாறவும்.

சூப்பரான மீல்மேக்கர் கீமா ஸ்டஃப்டு தோசை ரெடி.
Tags:    

Similar News