ஆன்மிகம்
இயேசு

தீமையும் நன்மையாக

Published On 2019-10-23 03:36 GMT   |   Update On 2019-10-23 03:36 GMT
சில குடும்பங்களில் ஏற்பட்ட வியாபார தோல்வி, மரணங்கள், உறவு பிரிந்த நிலையில், சிலருக்கு ஏற்பட்ட வேலை இழப்புகள், திருமண தடைகள், சிலரால் இழைக்கப்பட்ட மிக மோசமான வேதனைக்குள் தள்ளியிருக்கின்றன.
“இதோ நான் புதிய காரியத்தை செய்கிறேன், இப்பொழுதே அது தோன்றும், நீங்கள் அதை அறியீர்களா? நான் வனாந்தரத்திலே வழியையும், அவாந்தரவெயிளில் ஆறுகளையும் உண்டாக்குவேன்(ஏசாயா 43:19) ”

இந்தியாவுக்கு கிறிஸ்தவத்தை சுமந்து வந்த மிஷனரிகளில் மிக முக்கியமானவர் வில்லியம் கேரி. அவர் இந்தியாவிற்கு வந்து இந்திய மொழிகளை கற்று இந்தியர்களுக்கு ஏசு கிறிஸ்துவை பற்றி நற்செய்தி அறிவித்தவர். தொடக்கத்தில் அவர் வங்காள மொழியை கற்று அந்த மொழியல் புதிய ஏற்பாட்டு வேதாகமத்தை சுமார் 12 ஆண்டுகால கடும் முயற்சியில் மொழி பெயர்ப்பு செய்தார். ஆனால் அச்சகத்தில் நடைபெற்ற தீ விபத்தில் அனைத்தும் எரிந்து போனது.

இருப்பினும் அவர் தன்னை திடப்படுத்திக்கொண்டு, மீண்டும் மொழி பெயர்ப்பு பணியில் இறங்கினார். இரண்டாவது மொழி பெயர்ப்பு முதல் மொழிபெயர்ப்பை விட மிக சிறப்பானதாகவும், தவறுகள் தவிர்க்கப்பட்டதாகவும் இருந்தது. ஒரு விபத்து ஒரு பெரிய முயற்சியின் பலனை அழித்துப்போட்டது போல தோன்றினாலும் உண்மையில் சிறப்பான ஒன்று உருவாவதற்கே அது வழிவகுத்தது.

கடவுள் சில நஷ்டங்கள் வாயிலாகவும், சில லாபங்களை உருவாக்குகிறார்.

சில நேரங்களில் நமக்கு நிகழ்கின்ற சில காரியங்கள் எந்த விதத்திலும் நன்மையானது என்று பார்க்க முடியாத அளவிற்கு தீமையானவையே ஆனால் நாம் கடவுளோடு இருந்தால் அந்த தீமையின் நடுவிலும் கடவுள் ஒரு நன்மையை உருவாக்குகிறார். நம்முடைய வாழ்க்கையின் எந்தவொரு தோல்வியின் நடுவிலும் நஷ்டத்தின் நடுவிலும் ஏமாற்றத்தின் நடுவிலும் கடவுளை உறுதியாக பற்றிக்கொள்டு வாழ பழகிக்கொள்ள வேண்டும். அப்போது அந்த தோல்விகளையும் நஷ்டங்களையும், ஏமாற்றங்களையும் கடவுள் உபயோகித்து ஒரு ஆசீர்வாதமான ஒன்றை ஏற்படுத்த வல்லவராயிருக்கின்றார்.

நகோழி தனது கணவனையும இழந்து 2 மகன்களையும் இழந்து தனது மருமகள்களின் எதிர்கால வாழ்க்கையும் கேள்விக்குறியாகி முதுமை அவளை வாட்டியனது என அனைத்தும் வேதனையானவைகளே. அவற்றை நன்மைகள் என கூற முடியாது. ஆனால் அந்த தீமையான சூழல்களை கடவுள் பக்குவமாக உபயோகித்து நகோமியின் மருமகள் ரூத்திதின் மகனான ஓபேத் தாவீது அரசனுக்கு தாத்தாவாகும் ஒரு நன்மையான சூழலை உருவாக்கினார் என்பது எத்தனை ஆறுதலான விஷயம்.

சில குடும்பங்களில் ஏற்பட்ட வியாபார தோல்வி, மரணங்கள், உறவு பிரிந்த நிலையில், சிலருக்கு ஏற்பட்ட வேலை இழப்புகள், திருமண தடைகள், சிலரால் இழைக்கப்பட்ட மிக மோசமான வேதனைக்குள் தள்ளியிருக்கின்றன. ஆனால் அனைகளின் நடுவில் கடவுளை உறுதியாக பிடித்துக்கொண்டதால் கடவுள் கேடானவைகளின் நடுவிலும் செயல்பட்டு முந்தியிருந்ததை விட மிக மேன்மையான சூழ்நிலைகளை ஏற்படுத்தியிருக்கிறார்.

“தொடக்கத்தில் நீ பெற்ற சில தோல்விகள், எதிர்கால
வெற்றிகளை தக்கவைக்கும் முள்வேலிகள்.”

சாம்சன் பால்.
Tags:    

Similar News