வடக்கன்குளம் பரலோக அன்னை ஆலய திருவிழா நாளை தொடங்குகிறது

ராதாபுரம் தாலுகா வடக்கன்குளம் பரிசுத்த திருகுடும்ப ஆலய பரிசுத்த புதுமை பரலோக அன்னை திருவிழா நாளை (ஞாயிற்றுக்கிழமை) தொடங்குகிறது. இதையொட்டி நாளை காலை 5 மணி, 6.45 மணி, 8.30 மணிக்கு காவல்கிணறு பங்குதந்தை மிக்கேல் மகிழன் தலைமையில் திருமுழுக்கு திருப்பலி நடைபெறுகிறது. தொடர்ந்து மாலை 6 மணிக்கு கொடி பவனியாக கொண்டு வரப்பட்டு, வள்ளியூர் பல்நோக்கு சேவா சங்க இயக்குனர் அன்புச்செல்வன் தலைமையில் கொடியேற்றம் நடைபெறுகிறது. அருட்தந்தை ஜூலியன்ஸ் மறையுரை நிகழ்த்துகிறார்.

முன்னதாக இன்று (சனிக்கிழமை) காலை 5 மணி, 6.15 மணி, 7.15 மணிக்கு திருப்பலியும், மாலை 6.30 மணிக்கு பாவசங்கீர்த்தனமும், தொடர்ந்து மறையுரை, நற்கருணை ஆசீரும் நடக்கிறது.

1-ம் திருவிழா தீபஒளி தினமாகவும், 2-ம் திருவிழா புனித டோன்போஸ்கோ தினமாகவும், 3-ம் திருவிழா மல்லிகா அரிசி ஆலை தினமாகவும், 4-ம் திருவிழா மஸ்கட் வாழ் வடவை மக்கள் தினமாகவும், 5-ம் திருவிழா சவுதி வாழ் வடவை மக்கள் தினமாகவும், 6-ம் திருவிழா துபாய் வாழ் வடவை மக்கள் தினமாகவும், 7-ம் திருவிழா வடவை தினமாகவும், 8-ம் திருவிழா மும்பை வடவை மக்கள் தினமாகவும், 10-ம் திருவிழா சென்னை வாழ் வடவை மக்கள் தினமாகவும் கொண்டாடப்படுகிறது.

திருவிழா ஏற்பாடுகளை பங்குதந்தை ததேயூஸ் ராஜன் தலைமையில் பங்கு நிதி குழுவினர், அருட்சகோதரிகள், இறைமக்கள் செய்து வருகிறார்கள்.