புனித உபகார மாதா ஆலய தேர்பவனி: திரளானவர்கள் கலந்து கொண்டனர்

நெல்லை மாவட்டம் பணகுடி அருகே உள்ள காவல்கிணறில் புனித உபகார மாதா ஆலயம் உள்ளது. இந்த ஆலய திருவிழா கடந்த 15-ந் தேதி கொடியேற்றத்துடன் தொடங்கியது. விழா நாட்களில் தினமும் காலை 5 மணிக்கு மறையுரை, திருப்பலியும், மாலை 6 மணிக்கு நற்கருணை ஆசீரும் நடந்தது.

8-ம் திருவிழாவான 22-ந் தேதி அன்று காலை திருப்பலியில் சிறுவர்- சிறுமிகளுக்கு புதுநன்மை வழங்கப்பட்டது. இரவு 7 மணிக்கு நற்கருணை பவனி நடந்தது.

9-ம் திருவிழாவான 23-ந்தேதி காலை 5 மணிக்கு திருயாத்திரை மற்றும் திருப்பலி நடந்தது. இரவு 7 மணிக்கு தூத்துக்குடி மறைமாவட்ட பிஷப் இவோன் அம்புரோஸ் தலைமையில் பெருவிழா மாலை ஆராதனையும், இரவு 10 மணிக்கு தேர்பவனியும் நடந்தது.

10-ம் திருவிழாவான நேற்று முன்தினம் காலை பிஷப் இவோன் அம்புரோஸ் தலைமையில் பெருவிழா பாடல் திருப்பலியும், உறுதி பூசுதல் அருள்விழாவும் நடந்தது. பிற்பகல் 3 மணிக்கு தேர்பவனி நடந்தது. இதில் திரளானவர்கள் கலந்து கொண்டு, மாதாவை வழிபட்டனர். தொடர்ந்து மாலை 6.30 மணிக்கு ஜெபமாலை, நற்கருணை ஆசீர் நடந்தது.

விழா ஏற்பாடுகளை பங்கு குரு எஸ்.மைக்கிள் மகிழன் அடிகளும், பங்குமக்களும் செய்து இருந்தனர்.