கமலை தொடர்ந்து வாரிசு நடிகரின் படத்தை இயக்கும் லோகேஷ் கனகராஜ்?

மாநகரம் படத்தின் மூலம் இயக்குனராக அறிமுகமான லோகேஷ் கனகராஜ், முதல் படத்திலேயே கவனம் ஈர்த்தார். பின்னர் அவர் இயக்கிய கைதி படம், மாபெரும் வெற்றி பெற்றது. இதன்மூலம் தமிழ் சினிமாவின் முன்னணி இயக்குனர்கள் பட்டியலில் இடம்பிடித்தார் லோகேஷ் கனகராஜ். 

கைதி படத்தின் வெற்றியை தொடர்ந்து விஜய்யை வைத்து மாஸ்டர் படத்தை இயக்கி முடித்திருக்கிறார். இந்த படம் பொங்கலையொட்டி வருகிற ஜனவரி 13-ந் தேதி ரிலீசாக உள்ளது. இதையடுத்து கமல் நடிக்கும் விக்ரம் படத்தை லோகேஷ் கனகராஜ் இயக்க உள்ளார்.

இந்நிலையில், லோகேஷ் கனகராஜுக்கு பிற மொழி படங்களை இயக்கவும் அழைப்பு வருகிறதாம். அதன்படி மெகா ஸ்டார் சிரஞ்சீவியின் மகனும், நடிகருமான ராம் சரணை வைத்து படம் இயக்க லோகேஷ் கனகராஜிடம் பேச்சுவார்த்தை நடைபெற்று வருவதாக கூறப்படுகிறது. விரைவில் இதுகுறித்த அறிவிப்பு வெளியாகக்கூடும் என எதிர்பார்க்கப்படுகிறது.