சினிமா
ஜெயலலிதாவாக ஆசைப்படும் ரீமா கல்லிங்கல்
மலையாளத்தில் முன்னணி நடிகையாக வலம் வரும் ரீமா கல்லிங்கல், தமிழகத்தின் முன்னாள் முதலமைச்சர் ஜெயலலிதாவின் வாழ்க்கை வரலாறு படத்தில் நடிக்க ஆசை இருப்பதாக கூறியிருக்கிறார்.
மலையாளத்தில் துணிச்சலான வேடங்களில் நடித்து பெயர் எடுத்தவர் ரீமா கல்லிங்கல். தமிழில் யுவன் யுவதி என்ற படத்தில் பரத்துக்கு ஜோடியாக நடித்தார். பின்னர் தமிழில் நடிக்கா விட்டாலும் கூட ஏற்கும் கதாபாத்திரங்களால் தென் இந்திய ரசிகர்களுக்கு ரீமா பரிச்சயம் தான்.
கடந்த 2013 ஆம் ஆண்டு திருமணம் செய்து கொண்ட ரீமா தொடர்ந்து மலையாள படங்களில் நடித்துவருகிறார். மறைந்த நடிகை சாவித்திரியின் வாழ்க்கை படத்தில் நடித்த கீர்த்தி சுரேசுக்கு பாராட்டு குவிவதால் ரீமாவுக்கும் அதே போல் வாழ்க்கை வரலாற்று படத்தில் நடிக்க ஆசை.
அப்படி நடிப்பதாக இருந்தால் தன்னுடைய தேர்வு ஜெயலலிதா தான் என்று கூறி இருக்கிறார். ஜெயலலிதா இறப்புக்கு பின் அவரது வாழ்க்கையை படமாக்க சிலர் முயற்சிக்கிறார்கள். ஆனால் ஜெயலலிதா முக சாயல் கொண்ட நடிகை கிடைக்காமல் அந்த முயற்சிகள் நிற்கின்றன.