2023 ஹூண்டாய் வெர்னா இந்திய வெளியீட்டு விவரம்

ஹூண்டாய் நிறுவனம் சில தினங்களுக்கு முன்பு தான் 2023 வெர்னா மாடலுக்கான டீசரை வெளியிட்டது. தற்போது புதிய ஹூண்டாய் வெர்னா மாடலின் வெளியீட்டு தேதி அறிவிக்கப்பட்டு இருக்கிறது. புதிய ஹூண்டாய் வெர்னா மாடல் இந்திய சந்தையில் மார்ச் 21 ஆம் தேதி வெளியிடப்படுகிறது.

ஏற்கனவே இந்த காருக்கான முன்பதிவு துவங்கி நடைபெற்று வருகிறது. 2023 ஹூண்டாய் வெர்னா மாடலுக்கான முன்பதிவு கட்டணம் ரூ. 25 ஆயிரம் என நிர்ணயம் செய்யப்பட்டு உள்ளது. புதிய வெர்னா காரை வாங்க விரும்புவோர் அருகாமையில் உள்ள ஹூண்டாய் விற்பனையகம் அல்லது அதிகாரப்பூர்வ வலைதளத்தில் முன்பதிவு செய்யலாம்.

புதிய ஹூண்டாய் வெர்னா மாடல் EX, S, SX மற்றும் SX (O) என நான்கு வேரியண்ட்களில் கிடைக்கிறது. புதிய ஹூண்டாய் வெர்னா கார் ஏழு மோனோடோன் மற்றும் இருவித டூயல் டோன் நிறங்களில் கிடைக்கிறது.

புதிய ஹூண்டாய் வெர்னா மாடல் இருவித பெட்ரோல் என்ஜின் ஆப்ஷன்களில் கிடைக்கிறது. 1.5 லிட்டர் டர்போ GDi பெட்ரோல் என்ஜினுடன் 6 ஸ்பீடு மேனுவல் டிரான்ஸ்மிஷன், 7 ஸ்பீடு டூயல் கிளட்ச் டிரான்ஸ்மிஷன் ஆப்ஷனுடன் வழங்கப்படுகிறது.

இதுதவிர 1.5 MPi பெட்ரோல் என்ஜின் வழங்கப்பட்டு இருக்கிறது. இந்த என்ஜின் 6MT மற்றும் இண்டெலிஜண்ட் வேரியபில் டிரான்ஸ்மிஷன் வழங்கப்படுகிறது. இரண்டு என்ஜின்களும் RDE விதிகளுக்கு உட்பட்டு E20 எரிபொருளுக்கு ஏற்ற வகையில் உருவாக்கப்பட்டுள்ளது.

இந்திய சந்தையில் புதிய ஹூண்டாய் வெர்னா மாடல் மாருதி சுசுகி சியாஸ், ஹோண்டா சிட்டி, ஸ்கோடா ஸ்லேவியா மற்றும் ஃபோக்ஸ்வேகன் விர்டுஸ் மாடல்களுக்கு போட்டியாக அமைய இருக்கிறது.