பிரீமியம் பட்ஜெட்டில் 2021 போக்ஸ்வேகன் டி ராக் அறிமுகம்

போக்ஸ்வேகன் நிறுவனம் புதிய டி ராக் எஸ்யுவி மாடலை இந்திய சந்தையில் அறிமுகம் செய்தது. இதன் விலை ரூ. 21.35 லட்சம், எக்ஸ்-ஷோரூம் என நிர்ணயம் செய்யப்பட்டு உள்ளது. புதிய போக்ஸ்வேகன் டி ராக் சிபியு முறையில் கொண்டு வரப்படுகிறது.

புதிய போக்ஸ்வேகன் டி ராக் விலை முந்தைய மாடலை விட ரூ. 1.35 லட்சம் அதிகம் ஆகும். புதிய மாடலுக்கான முன்பதிவு துவங்கி நடைபெற்று வருகிறது. முன்பதிவு ஆன்லைன் மற்றும் விற்பனையகங்களில் நடைபெற்று வருகிறது. புதிய டி ராக் மாடல் MQB பிளாட்பார்மில் உருவாகி இருக்கிறது.

புதிய டி ராக் மாடலில் எல்இடி ஹெட்லேம்ப், தொடுதிரை வசதி கொண்ட இன்போடெயின்மென்ட் சிஸ்டம், ஆப்பிள் கார்பிளே மற்றும் ஆண்ட்ராய்டு ஆட்டோ கனெக்டிவிட்டி வழங்கப்படுகிறது.

இத்துடன் ஆட்டோமேடிக் கிளைமேட் கண்ட்ரோல், பானரோமிக் சன்ரூப், 6 ஏர்பேக், டையர் பிரஷர் மாணிட்டரிங் சிஸ்டம் போன்ற அம்சங்களும் வழங்கப்பட்டு உள்ளது. புதிய டி ராக் மாடலில் 1.5 லிட்டர் டிஎஸ்ஐ பெட்ரோல் என்ஜின் வழங்கப்பட்டு இருக்கிறது.

இந்த என்ஜின் 148 பிஹெச்பி பவர், 250 என்எம்  டார்க் செயல்திறன் வழங்குகிறது. இத்துடன் 7 ஸ்பீடு டிஎஸ்ஜி டிரான்ஸ்மிஷன் வழங்கப்படுகிறது. புதிய 2021 டி ராக் மாடல் ஜீப் காம்பஸ், எம்ஜி ஹெக்டார், டாடா ஹேரியர் மற்றும் ஹூண்டாய் டக்சன் போன்ற மாடல்களுக்கு போட்டியாக இருக்கும்.