2022 ஹோண்டா சிவிக் ப்ரோடோடைப் அறிமுகம்

ஹோண்டா நிறுவனத்தின் சிவிக் செடான் ப்ரோடோடைப் மாடல் சர்வதேச சந்தையில் அறிமுகம் செய்யப்பட்டு இருக்கிறது. புதிய சிவிக் ப்ரோடோடைப் தற்போதைய சிவிக் மாடலை விட அதிநவீன தோற்றம் கொண்டிருக்கிறது.

2022 சிவிக் மாடல் மினிமலிஸ்டிக் ஸ்டைலிங், சிறு வளைவுகள், கிரீஸ்கள் இடம்பெற்று இருக்கின்றன. இவை காருக்கு நவீன தோற்றத்தை வழங்குகிறது. இத்துடன் கூர்மையான எல்இடி ஹெட்லேம்ப்கள், இன்டகிரேட் செய்யப்பட்ட எல்இடி டிஆர்எல்கள், பியானோ-பிளாக் பினிஷ் செய்யப்பட்ட கிரில், முன்புற பம்ப்பரில் ஏர் டேம் வழங்கப்பட்டு இருக்கிறது.

இத்துடன் 19 இன்ச் அலாய் வீல்கள், கருப்பு நிற ORVMகள் வழங்கப்பட்டுள்ளன. இது பிளாக்டு-அவுட் பி-பில்லருடன் மேட்ச் ஆகும் வகையில் உருவாக்கப்பட்டு உள்ளது. பின்புறம் ஸ்மோக்டு எல்இடி டெயில் லைட்கள் டூயல் எக்சாஸ்ட் பைப்கள் வழங்கப்பட்டு உள்ளன.

புதிய ஹோண்டா சிவிக் 11-ஆம் தலைமுறை மாடல் பல்வேறு பாடி டைப்களில் கிடைக்கும் என ஹோண்டா நிறுவனம் தெரிவித்து இருக்கிறது. இது செடான் மற்றும் ஹேட்ச்பேக் வடிவில் கிடைக்கும். இதுதவிர டைப் ஆர் வெர்ஷனும் அறிமுகம் செய்யப்பட இருக்கிறது.