ஆட்டோமொபைல்
அடுத்த தலைமுறை ஹூண்டாய் ஐ20 வெளியீட்டு விவரம்
ஹூண்டாய் நிறுவனத்தின் அடுத்த தலைமுறை ஹூண்டாய் ஐ20 கார் வெளியீட்டு விவரங்களை தொடர்ந்து பார்ப்போம்.
ஹூண்டாய் நிறுவனம் தனது அடுத்த தலைமுறை ஹூண்டாய் ஐ20 மாடல் காரை செப்டம்பர் மாத வாக்கில் வெளியிட இருப்பதாக தகவல் வெளியாகியுள்ளது. புதிய ஹூண்டாய் ஐ20 மாடலின் வடிவமைப்பில் மாற்றம் செய்யப்படலாம் என எதிர்பார்க்கப்படுகிறது. புதிய ஹூண்டாய் ஐ20 மாடல் மூன்றுவித என்ஜின் ஆப்ஷன்களில் கிடைக்கும் என தெரிகிறது.
புதிய ஹூண்டாய் ஐ20 ஹேட்ச்பேக் மாடலின் முன்புறம் கேஸ்கேடிங் கிரில், மேம்பட்ட வடிவமைப்பு கொண்ட ஹெட்லேம்ப்கள் வழங்கப்படுகின்றன. இவை முந்தைய மாடல்களில் இருந்ததை விட தற்சமயம் மெல்லியதாக இருக்கின்றன. இதன் பூட்-லிப் பகுதியில் பொருத்தப்பட்டுள்ள புதிய லைட் பார் மேம்பட்ட டெயில் லைட்களுடன் இணைக்கப்பட்டுள்ளது.
இதேபோன்று காரின் பக்கவாட்டு பகுதியிலும் மாற்றங்கள் மேற்கொள்ளப்பட்டுள்ளது. புதிய தலைமுறை ஐ20 மாடலில் டூயல் டோன் அலாய் வீல்கள், நீட் ஃபார் ஸ்பீடு மற்றும் ஃபோர்ஸா போன்ற வீடியோ கேம் சீரிஸ்களை தழுவி உருவாக்கப்பட்டு இருக்கிறது. மேலும் இவற்றில் உள்ள கிரீஸ் கோடுகள் காருக்கு கம்பீரமான தோற்றத்தை வழங்குகிறது.
காரின் உள்புறம் மேம்பட்ட புதிய டேஷ்போர்டு டிசைன் வழங்கப்பட்டுள்ளது. இத்துடன் நான்கு ஏர்-கான் வென்ட்களையும் இணைக்க கிடைமட்ட கோடுகள் வழங்கப்பட்டுள்ளன. இத்துடன் 10.25 அங்குல அளவில் இரண்டு டிஸ்ப்ளேக்கள் வழங்கப்பட்டுள்ளன. இவற்றில் ஒன்று இன்ஸ்ட்ரூமென்ட் கிளஸ்டர் மற்றொன்று தொடுதிரை வசதி கொண்ட இன்ஃபோடெயின்மென்ட் சிஸ்டம் ஆகும்.
புதிய ஐ20 காரில் 1.2 லிட்டர் டர்போ பெட்ரோல் என்ஜின் மற்றும் 48 வோல்ட் மைல்டு ஹைப்ரிட் தொழில்நுட்பம் வழங்கப்படும் என எதிர்பார்க்கப்படுகிறது. இத்துடன் 6 ஸ்பீடு இன்டெலிஜண்ட் மேனுவல் டிரான்ஸ்மிஷன் வழங்கப்படலாம். இதுதவிர 1.2 லிட்டர் பெட்ரோல் மற்றும் 1.5 லிட்டர் டீசல் என்ஜின் ஆப்ஷன்களும் வழங்கப்படலாம்.