ஆட்டோமொபைல்
புதிய பல்சர் 250 சீரிஸ் மாடல்களை அறிமுகம் செய்த பஜாஜ்
பஜாஜ் ஆட்டோ நிறுவனம் இந்திய சந்தையில் இரண்டு புதிய பல்சர் மோட்டார்சைக்கிள் மாடல்களை அறிமுகம் செய்தது.
பஜாஜ் ஆட்டோ நிறுவனம் தனது பல்சர் சீரிசை இந்தியாவில் அப்டேட் செய்தது. இந்திய சந்தையில் பல்சர் என்250 மற்றும் எப்250 என இரண்டு புதிய மோட்டார்சைக்கிள் மாடல்கள் அறிமுகம் செய்யப்பட்டு இருக்கின்றன. இவற்றின் விலை முறையே ரூ. 1.38 லட்சம் மற்றும் ரூ. 1.40 லட்சம் என நிர்ணயம் செய்யப்பட்டுள்ளது. அனைத்து விலைகளும் எக்ஸ்-ஷோரூம் அடிப்படையில் குறிப்பிடப்பட்டு இருக்கிறது.
இரு மாடல்களிலும் ஒரே மாதிரியான அம்சங்களே வழங்கப்பட்டு இருக்கின்றன. இவற்றில் 249.07சிசி, சிங்கில் சிலிண்டர், ஏர்/ஆயில் கூல்டு என்ஜின் வழங்கப்பட்டு இருக்கிறது. இந்த என்ஜின் 24 பி.ஹெச்.பி. திறன், 21.5 நியூட்டன் மீட்டர் டார்க் இழுவிசையை வெளிப்படுத்துகிறது. இத்துடன் 5 ஸ்பீடு கியர்பாக்ஸ் வழங்கப்பட்டுள்ளது.
அம்சங்களை பொருத்தவரை இரு மாடல்களிலும் புல் எல்.இ.டி. லைட்டிங், செமி டிஜிட்டல் இன்ஸ்ட்ரூமெண்ட் கிளஸ்டர், ஸ்ப்லிட்-ஸ்டைல் சீட், சைடு-ஸ்லிங் டூயல் பாரெல் எக்சாஸ்ட், டூயல் சேனல் ஏ.பி.எஸ். உள்ளிட்டவை வழங்கப்பட்டு இருக்கின்றன.
இந்திய சந்தையில் பஜாஜ் பல்சர் என்250 சுசுகி ஜிக்சர் 250 மற்றும் யமஹா எப்.இசட்.250 போன்ற மாடல்களுக்கு போட்டியாக அமைகிறது. புதிய பஜாஜ் பல்சர் எப்250 மாடல் சுசுகி ஜிக்சர் 250 எஸ்.எப். மற்றும் யமஹா பேசர் 250 போன்ற மாடல்களுக்கு போட்டியாக அமைகிறது.