விற்பனையில் ஹூண்டாய் நிறுவனத்தை பின்னுக்குத்தள்ளிய மாருதி சுசுகி

இந்திய சந்தையின் அதிகம் விற்பனையாகும் காம்பேக்ட் எஸ்.யு.வி. மாடல்கள் பிரிவில் மாருதி சுசுகி நிறுவனத்தின் விட்டாரா பிரெஸ்ஸா முதலிடம் பிடித்து இருக்கிறது. 2021 முதல் அரையாண்டு காலக்கட்டத்தில் 60,183 விட்டாரா பிரெஸ்ஸா யூனிட்கள் விற்பனையாகி இருக்கின்றன.

இதே காலக்கட்டத்தில் ஹூண்டாய் நிறுவனத்தின் வென்யூ 54,675 யூனிட்கள் விற்பனையாகி இருக்கிறது. கடந்த ஆண்டு ஜூன் மாத விற்பனையுடன் ஒப்பிடும் போது இரு மாடல்களின் விற்பனையும் 50 சதவீதம் அதிகரித்து உள்ளது. இந்தியாவில் அதிகம் விற்பனையாகும் காம்பேக்ட் எஸ்.யு.வி. மாடல்களில் மூன்றாவது இடத்தை டாடா நெக்சான் பெற்று இருக்கிறது. 

மாருதி சுசுகி விட்டாரா பிரெஸ்ஸா மாடலில் 1.5 லிட்டர் கே சீரிஸ் பெட்ரோல் என்ஜின் வழங்கப்பட்டு இருக்கிறது. இந்த என்ஜின் 103 பி.ஹெச்.பி. பவர், 138 நியூட்டன் மீட்டர் டார்க் செயல்திறன் வழங்குகிறது. இத்துடன் 5 ஸ்பீடு மேனுவல், ஆட்டோமேடிக் டிரான்ஸ்மிஷன் மற்றும் ஸ்மார்ட் ஹைப்ரிட் தொழில்நுட்பம் வழங்கப்படுகிறது.