முன்பதிவில் தொடர்ந்து அசத்தும் மஹிந்திரா தார்

மஹிந்திரா நிறுவனம் புதிய தலைமுறை தார் மாடல் காரை கடந்த ஆண்டு அக்டோபர் மாதத்தில் அறிமுகம் செய்தது. அறிமுகமானது முதல் இந்த மாடல் பெரும் வரவேற்பை பெற்று வருகிறது. கடந்த ஜனவரியில் மட்டும் புதிய தார் மாடலை வாங்க 6 ஆயிரத்திற்கும் அதிக முன்பதிவுகளை பெற்றது. 

இந்நிலையில், புதிய மஹிந்திரா தார் மாடல் இதுவரை சுமார் 39 ஆயிரத்திற்கும் அதிக முன்பதிவுகளை பெற்று இருப்பதாக மஹிந்திரா அண்ட் மஹிந்திரா நிறுவனம் அதிகாரப்பூர்வமாக அறிவித்து உள்ளது. புதிய தார் மாடல் மூன்று வேரியண்ட்களில் கிடைக்கிறது.

இந்திய சந்தையில் புதிய மஹிந்திரா தார் மாடல் விலை ரூ. 9.80 லட்சம், எக்ஸ்-ஷோரூம் என நிர்ணயம் செய்யப்பட்டு உள்ளது. புதிய மஹிந்திரா தார் மாடல் ஆறுவித நிறங்களில் கிடைக்கிறது. 2020 மஹிந்திரா தார் மாடலில் 2.2 லிட்டர் டீசல் என்ஜின் வழங்கப்பட்டு உள்ளது. இந்த என்ஜின் 130 பிஹெச்பி பவர், 300 என்எம் டார்க் செயல்திறன் வழங்குகிறது. 

இத்துடன் 2.0 லிட்டர் பெட்ரோல் என்ஜினும் வழங்கப்படுகிறது. இது 150 பிஹெச்பி பவர், 320 என்எம் டார்க் செயல்திறன் வழங்குகிறது. இந்த என்ஜின்களுடன் 6 ஸ்பீடு மேனுவல் டிரான்ஸ்மிஷன் மற்றும் 6 ஸ்பீடு ஆட்டோமேடிக் யூனிட் வழங்கப்படுகிறது.