ஆட்டோமொபைல்
ஸ்கோடா எலெக்ட்ரிக் எஸ்யுவி டீசர்கள் வெளியீடு
ஸ்கோடா நிறுவனத்தின் புதிய எலெக்ட்ரிக் கார் டீசர்கள் வெளியிடப்பட்டுள்ளன. இவற்றின் முழு விவரங்களை பார்ப்போம்.
ஸ்கோடா ஆட்டோ நிறுவனம் தனது எலெக்ட்ரிக் எஸ்யுவி மாடலின் முதற்கட்ட டீசர்களை அதிகாரப்பூர்வமாக வெளியிட்டுள்ளது. புதிய ஸ்கோடா என்யாக் அந்நிறுவனத்தின் முதல் எலெக்ட்ரிக் எஸ்யுவி மாடல் ஆகும். இது ஃபோக்ஸ்வேகன் நிறுவனத்தின் MEB எலெக்ட்ரிக் வாகன பிளாட்ஃபார்மில் உருவாகியுள்ளது.
ஸ்கோடா வெளியிட்டுள்ள முதற்கட்ட புகைப்படங்களில் ப்ரோடோடைப் வாகனம் முழுமையாக மறைக்கப்பட்டுள்ளது. ஸ்கோடா என்யாக மாடல் ஃபோக்ஸ்வேகன் குழுமத்தின் அங்கமாக உருவாகியுள்ளது. இது ஐடி 4 எலெக்ட்ரிக் மாடலை தழுவிய வடிவமைப்பு கொண்டிருக்கிறது.
அளவீடுகளில் ஸ்கோடா என்யாக் எலெக்ட்ரிக் கார் 4648 எம்எம் நீளமாகவும் 1877 எம்எம் அகலமாகவும், 1618 எம்எம் உயரமாகவும் இருக்கிறது. இதன் வீல்பேஸ் 2765 எம்எம் அளவிலும் பூட்-ஸ்பேஸ் 585 லிட்டர்களாகும்.
ஸ்கோடா என்யாக் பேஸ் மாடலில் 55kWh யூனிட் பேட்டரி வழங்கப்படுகிறது. இது 146 பிஹெச்பி பவர் வழங்கும் என கூறப்படுகிறது. மேலும் இதனை ஒருமுறை சார்ஜ் செய்தால் 340 கிலோமீட்டர் வரை செல்ல முடியும். மிட் ரேஞ்ச் மாடலில் 62kWh யூனிட் பேட்டரி வழங்கப்படுகிறது. இது 177 பிஹெச்பி செயல்திறனும் ஒருமுறை சார்ஜ் செய்தால் 390 கிலோமீட்டர் வரை செல்ல முடியும்.
டாப் எண்ட் மாடலில் 82kWh யூனிட் பேட்டரி வழங்கப்படுகிறது. இது 201 பிஹெச்பி பவர் வழங்கும் என்றம் ஒருமுறை சார்ஜ் செய்தால் 500 கிலோமீட்டர் வரை செல்ல முடியும் என கூறப்படுகிறது. மேலும் இத்துடன் டூயல் எலெக்ட்ரிக் மோட்டார்கள் வழங்கப்படுகிறது.