எம்.ஜி. ஹெக்டார் பிளஸ் வெளியீட்டு விவரம்

எம்.ஜி. மோட்டார் இந்தியா நிறுவனம் தனது ஹெக்டார் பிளஸ் காரை 2020 ஆட்டோ எக்ஸ்போ விழாவில் அறிமுகம் செய்தது. ஆறு மற்றும் ஏழு பேர் அமரக்கூடிய வகையில் கிடைக்கும் ஹெக்டார் பிளஸ் இந்தியாவில் இந்த ஆண்டின் இரண்டாவது பாதியில் வெளியிட இருப்பதாக கூறப்படுகிறது.

முன்னதாக 2019 ஜூன் மாதத்தில் எம்.ஜி. மோட்டார் நிறுவனம் ஹெக்டார் காரை அறிமுகம் செய்தது. அந்த வகையில் புதிய ஹெக்டார் பிளஸ் மாடலும் இந்த ஆண்டு ஜூன் மாதத்தில் வெளியிடப்படலாம் என எதிர்பார்க்கப்படுகிறது. கார் அளவீடு விவரங்களை எம்.ஜி. மோட்டார் இதுவரை அறிவிக்கவில்லை, எனினும் இது சற்றே பெரியதாக காட்சியளிக்கிறது.

காரின் வெளிப்புறம் ட்வீக் செய்யப்பட்டு புதிய குரோம் கிரில், புதிய தோற்றம் கொண்ட எல்.இ.டி. டி.ஆர்.எல்.கள் வழங்கப்பட்டுள்ளது. பின்புறம் ஹெக்டார் பிளஸ் மாடலில் எல்.இ.டி. டெயில் லைட்கள் மற்றும் புதிய பம்ப்பர் வழங்கப்பட்டுள்ளன.

புதிய ஹெக்டார் பிளஸ் மாடலில் 170 பி.ஹெச்.பி. பவர் வழங்கும் 2.0 லிட்டர் டீசல் மோட்டார் மற்றும் 1.5 லிட்டர் டர்போசார்ஜ் செய்யப்பட்ட பெட்ரோல் யூனிட் மற்றும் மைல்டு ஹைப்ரிட் சிஸ்டம் வழங்கப்படுகிறது. இத்துடன் 6 ஸ்பீடு மேனுவல் டிரான்ஸ்மிஷன் மற்றும் 6-ஸ்பீடு டி.சி.டி. வழங்கப்படுகிறது.