ஆட்டோமொபைல்
டிசம்பர் காலாண்டில் பஜாஜ் ஆட்டோ லாபம் 15 சதவீதம் உயர்வு
2019 டிசம்பர் வரை நிறைவுற்ற காலாண்டில் பஜாஜ் ஆட்டோ நிறுவனத்தின் லாபம் 15 சதவீதம் அதிகரித்து இருக்கிறது.
இந்திய ஆட்டோமொபைல் சந்தையில் டிசம்பர் மாதத்துடன் நிறைவடைந்த காலாண்டில் பஜாஜ் ஆட்டோ நிறுவனத்தின் லாபம் 15 சதவீதம் உயர்ந்து ரூ.1,262 கோடியாக இருக்கிறது. சென்ற நிதி ஆண்டின் இதே காலாண்டில் அது ரூ.1,102 கோடியாக இருந்தது.
இதே காலத்தில் இந்நிறுவனத்தின் செயல்பாட்டு வருவாய் 3 சதவீதம் வளர்ச்சி கண்டு ரூ.7,640 கோடியாக இருக்கிறது. கடந்த நிதி ஆண்டின் இதே காலாண்டில் அது ரூ.7,436 கோடியாக இருந்தது. மொத்த லாபம் 13 சதவீதம் உயர்ந்து ரூ.1,406 கோடியாக உள்ளது.
பஜாஜ் ஆட்டோ நிறுவனத்தின் செயல்பாட்டு லாபம் 15 சதவீதம் வளர்ச்சி பெற்று ரூ. 1,344 கோடியாக இருக்கிறது. இது முந்தைய ஆண்டின் இதே காலாண்டில் ரூ. 1,172 கோடியாக இருந்தது.
விற்பனையை பொருத்தவரை பஜாஜ் ஆட்டோ நிறுவனம் உள்நாட்டில் மொத்தம் 5.42 லட்சம் மோட்டார்சைக்கிள்களை விற்பனை செய்திருக்கிறது. கடந்த ஆண்டின் இதே காலாண்டில் இந்நிறுவனம் 6.44 லட்சம் யூனிட்களை விற்பனை செய்துள்ளது. இது கடந்த ஆண்டின் முந்தைய காலாண்டுடன் ஒப்பிடும் போது 16 சதவீதம் சரிவாகும்.
வெளிநாட்டு சந்தையில் பஜாஜ் ஆட்டோ நிறுவனம் 4.84 லட்சம் மோட்டார்சைக்கிள்களை விற்பனை செய்திருக்கிறது. இது முந்தைய ஆண்டுடன ஒப்பிடும் போது 11 சதவீதம் அதிகம் ஆகும்.