டாப் 10 கார்கள் பட்டியலில் மாருதி சுசுகியின் 8 மாடல்கள்

2019 டிசம்பர் மாத விற்பனை அடிப்படையில் அமைந்த டாப் 10 கார்கள் பட்டியலில் மாருதி சுசுகியின் 8 மாடல்கள் இடம் பெற்றுள்ளன. இந்த பட்டியலில் மாருதி பலேனோ முதலிடம் பிடித்திருக்கிறது. இதுகுறித்து இந்திய மோட்டார் வாகன தயாரிப்பாளர்கள் சங்கம் (சியாம்) வெளியிட்டுள்ள புள்ளிவிவரங்களை தொடர்ந்து பார்ப்போம்.

மாருதி சுசுகி நிறுவனம் கடந்த ஆண்டு டிசம்பர் மாதத்தில் மொத்தம் 18,465 பலேனோ கார்களை விற்பனை செய்து இருக்கிறது. முந்தைய ஆண்டின் இதே மாதத்தில் அது 11,135-ஆக இருந்தது. டாப் 10 கார்கள் பட்டியலில் பலேனோ முதல் இடத்திற்கு முன்னேறியது.

மாருதி ஆல்டோ விற்பனை 38 சதவீதம் குறைந்து (25,121-ல் இருந்து) 15,489 கார்களாக குறைந்து இருக்கிறது. இது இரண்டாவது இடத்திற்கு சென்று இருக்கிறது. மாருதி செடன் மாடலான டிசையர் கார் 3-வது இடத்திற்கு சென்றுள்ளது. இந்த கார் விற்பனை 15,286-ஆக குறைந்து இருக்கிறது. முந்தைய ஆண்டின் இதே மாதத்தில் அது 16,797 கார்களாக இருந்தது.

மாருதி ஸ்விஃப்ட் விற்பனை 14,749-ஆக அதிகரித்து இருக்கிறது. முந்தைய ஆண்டின் இதே மாதத்தில் அது 11,790-ஆக இருந்தது. இது நான்காவது இடத்தில் நீடிக்கிறது. மாருதி விட்டாரா பிரெஸ்ஸா 7-வது இடத்தில் இருந்து ஐந்தாவது இடத்திற்கு முன்னேறி உள்ளது. இந்த கார் விற்பனை (9,667-ல் இருந்து) 13,658-ஆக உயர்ந்துள்ளது.

மாருதி வேகன் ஆர் கார் விற்பனை 10,781-ஆக இருக்கிறது. இந்த கார் ஆறாவது இடத்தில் இருக்கிறது. ஹூண்டாய் மோட்டார் நிறுவனத்தின் வென்யூ கார் விற்பனை 9,521-ஆக உள்ளது. இது டாப் 10 பட்டியலில் 7-வது இடத்திற்கு வந்துள்ளது. மாருதியின் எஸ் பிரெஸ்ஸோ விற்பனை 8,394-ஆக இருக்கிறது. இந்த கார் எட்டாவது இடத்தில் இருக்கிறது.

எலைட் ஐ20 கார் விற்பனை 7,720-ஆக உள்ளது. முந்தைய ஆண்டின் இதே மாதத்தில் அது 11,940-ஆக இருந்தது. இந்த கார் 9-வது இடத்திற்கு சென்றுள்ளது. மாருதியின் ஈகோ கார் விற்பனை 11 சதவீதம் குறைந்து (8,532-ல் இருந்து) 7,634-ஆக குறைந்து இருக்கிறது. இந்த கார் 10 இடத்தில் இருக்கிறது.