வளைந்த ஸ்கிரீன் கொண்டு உருவாகும் ஒப்போ நிறுவனத்தின் முதல் ஸ்மார்ட்வாட்ச்

ஒப்போ ஸ்மார்ட்வாட்ச் பற்றிய விவரங்கள் இணையத்தில் தொடர்ந்து வெளியாகி வந்தன. இதன் தொடர்ச்சியாக கடந்த மாதம் நடைபெற்ற விழா ஒன்றில் ஒப்போ ஸ்மார்ட்வாட்ச் மாடல் 2020 ஆண்டின் முதல் காலாண்டு வாக்கில் அறிமுகம் செய்யப்படும் என ஒப்போ தெரிவித்தது.

அந்த வகையில் ஒப்போ நிறுவனத்தின் முதல் ஸ்மார்ட்வாட்ச் மாடலின் புகைப்படத்தை ஒப்போ நிறுவன துணை தலைவர் ப்ரியன் ஷென் வெளியிட்டிருக்கிறார். புகைப்படத்தில் ஒப்போவின் முதல் ஸ்மார்ட்வாட்ச் மாடலில் வளைந்த ஸ்கிரீன் வழங்கப்பட இருப்பது தெரியவந்துள்ளது.

இத்துடன் ஸ்மார்ட்வாட்ச் மாடல் கோல்டு கேசிங் மற்றும் பக்கவாட்டில் இரண்டு பட்டன்களை கொண்டிருக்கிறது. இவற்றில் ஒரு பட்டன் நோட்டிஃபிகேஷன் லைட் கொண்டிருக்கும் என தெரிகிறது. பட்டன்களிடையே மைக்ரோபோன் வழங்கப்படுகிறது. அந்த வகையில் புதிய ஸ்மார்ட்வாட்ச் அழைப்புகளை மேற்கொள்ளும் வசதி கொண்டிருக்கும் என எதிர்பார்க்கலாம்.

ஒப்போ நிறுவன முதல் ஸ்மார்ட்வாட்ச் 5ஜி வெர்ஷன் ஒன்றும் அறிமுகம் செய்யப்படும் என கூறப்படுகிறது. புகைப்படத்தில் சிலிகான் ஸ்டிராப் வழங்கப்படுவதும், லெதர் ஸ்டிராப் ஆப்ஷன்கள் வழங்கப்படும் என கூறப்படுகிறது. புதிய ஸ்மார்ட்வாட்ச் மாடல் ஒப்போ ஃபைண்ட் எக்ஸ்2 மற்றும் ஃபைண்ட் எக்ஸ்2 ப்ரோ ஸ்மார்ட்போன்களுடன் அறிமுகம் செய்யலாம் என எதிர்பார்க்கப்படுகிறது.

ஒப்போ ஃபைண்ட் சீரிஸ் ஸ்மார்ட்போன்கள் அடுத்த மாதம் அறிமுகம் செய்யப்படலாம் என கூறப்படுகிறது. சமீபத்தில் ஒப்போ ஃபைண்ட் எக்ஸ் 2 ப்ரோ ஸ்மார்ட்போன் இந்திய சான்று பெற்று இருப்பதாக தகவல் வெளியானது. அந்த வகையில் இந்த ஸ்மார்ட்போன் இந்தியாவிலும் அறிமுகமாகும் என தெரிகிறது.