போலீஸ் பணிக்கு எழுத்து தேர்வு

புதுச்சேரி:

புதுவை காவல் துறையில் காலியாக உள்ள 253 போலீஸ், 26 டிரைவர் பணியிடங்களை நிரப்ப கடந்த மார்ச் மாதம் உடல் தகுதி தேர்வு நடந்தது.

இதில் போலீஸ் பணியிடத்துக்கு ஆண்கள் 2 ஆயிரத்து 91, பெண்கள் ஆயிரத்து 16 என மொத்தம் 3 ஆயிரத்து 107 பேர் தகுதி பெற்றனர்.

டிரைவர் பணிக்கு 73 பேர் தேர்வு பெற்றனர். போலீஸ் தேர்வில் தேர்ச்சி பெற்றவர்களுக்கு எழுத்து தேர்வு நடந்தது.

புதுவையில் லாஸ்பேட்டை வள்ளலார் அரசு பெண்கள் மேல்நிலைப்பள்ளி, பாக்குமுடையான்பட்டு இதயா பெண்கள் கல்லூரி, சங்கரவித்யாலயா பள்ளி, விவேகானந்தா பள்ளி, முத்தியால்பேட்டை பாரதிதாசன் கல்லூரி, கருவடிகுப்பம் பாத்திமா மேல்நிலைப்பள்ளி உட்பட மொத்தம் 9 மையங்களில் எழுத்து தேர்வு நடந்தது.

முதல்தாள் தேர்வு காலை 10 மணி முதல் 12 மணி வரை நடந்தது. தேர்வர்களின் வருகை பயோமெட்ரிக் முறையில் பதிவு செய்யப்பட்டது. காலை 8 மணிக்கே தேர்வர்கள் வந்திருந்தனர்.

முழுமையான சோதனைக்கு பின்னரே தேர்வு அறைக்குள் அனுமதிக்கப்பட்டனர்.

செல்போன், ஸ்மார்ட் வாட்ச் உட்பட நவீன தொழில்நுட்ப சாதனங்களுக்கு தடை விதிக்கப்பட்டது. பலத்த போலீஸ் பாதுகாப்புடன் தேர்வு நடத்தப்பட்டது.

தேர்வர்கள் ஆர்வத்துடன் தேர்வுகளை எழுதினர். அரசு செயலர் குமார் தலைமையில் பணியாளர் நிர்வாக சீர்திருத்த துறையினர் தேர்வுகளை நடத்தினர். இன்று மதியம் 2 மணி முதல் 4 மணி வரை 2-ம் தாள் தேர்வு நடக்கிறது.

தேர்வு முடிவுகள் ஓரிருநாளில் அறிவிக்கப்பட உள்ளன.