சென்னை :
பாராளுமன்ற தேர்தல் நடத்தை விதிமுறைகள் அமலுக்கு வந்ததை தொடர்ந்து சென்னையில் கட்சி கொடிகள், பதாகைகள், போஸ்டர்கள் அகற்றப்பட்டு வருகின்றன. சுவர்களில் எழுதப்பட்ட கட்சி விளம்பரங்களும் அழிக்கப்பட்டு வருகின்றன.
கடந்த 2 தினங்களில் மட்டும் 10 ஆயிரத்துக்கும் மேற்பட்ட இடங்களில் கட்சிக்கொடிகள், பதாகைகள் அகற்றப்பட்டுள்ளன. விதிகளை மீறி சுவர்களில் எழுதப்படும் கட்சி விளம்பரங்களும் அழிக்கப்பட்ட பிறகு அந்த கட்சி நிர்வாகிகளுக்கு தேர்தல் அதிகாரிகள் எச்சரிக்கை விடுத்துள்ளனர்.
சென்னையில் 3 தொகுதிகளிலும் 944 இடங்களில் 3,719 வாக்குச்சாவடிகள் அமைக்கப்படுகின்றன. அந்த பகுதிகளில் உள்ள கொடி கம்பங்கள் முழுமையாக அகற்றப்பட்டு வருகின்றன.
அதுபோல சென்னையில் ஓட்டு எண்ணிக்கை நடைபெறும் ராணிமேரி கல்லூரி, அண்ணா பல்கலைக்கழகம், லயோலா கல்லூரி ஆகிய 3 இடங்கள் அருகிலும் கட்சி கொடிகள் இல்லாதவாறு விளம்பரங்களை அகற்றும் பணி நடந்து வருகிறது.
நேற்று மட்டும் சுமார் 5,200 இடங்களில் சுவர் விளம்பரங்கள் அழிக்கப்பட்டன. 2931 போஸ்டர்கள், 149 பேனர்கள் அதிரடியாக சென்னை மாநகராட்சி ஊழியர்களால் அகற்றப்பட்டது.
