திருமண நிகழ்ச்சியில் நடனமாடிய என்ஜினீயரிங் மாணவர் சுருண்டு விழுந்து மரணம்

போரூர்:

ஆந்திர மாநிலத்தை சேர்ந்தவர் சத்யசாய் ரெட்டி (வயது21). பூந்தமல்லியில் உள்ள தனியார் கல்லூரியில் 4-ம் ஆண்டு என்ஜினீயரிங் படித்து வந்தார்.

இவரது பெண் தோழி ஒருவரின் சகோதரிக்கு கோயம்பேடு நூறடி சாலையில் உள்ள திருமண மண்டபத்தில் இன்று திருமணம் நடைபெற்றது. முன்னதாக நேற்று இரவு திருமண வரவேற்பு நிகழ்ச்சி விமரிசையாக நடைபெற்றது.

இதில் சத்யசாய் ரெட்டி தனது நண்பர்களுடன் கலந்து கொண்டார். அப்போது சத்யசாய் மற்றும் அவரது நண்பர்கள் அங்கு நடந்த இசை கச்சேரியின் பாடலுக்கு ஏற்ப உற்சாகமாக நடனமாடினர். சத்ய சாய் நடனமாடிக்கொண்டு இருந்த போது திடீரென அவர் சுருண்டு தரையில் விழுந்தார். சிறிது நேரத்தில் அவருக்கு வலிப்பு ஏற்பட்டு காதில் இருந்து ரத்தம் கொட்டியது.

இதனை கண்டு திருமண மண்டபத்தில் இருந்த அவரது நண்பர்கள் மற்றும் திருமண நிகழ்ச்சிக்கு வந்தவர்கள் அதிர்ச்சி அடைந்தனர். உடனடியாக சத்யசாயை மீட்டு அருகில் உள்ள ஆஸ்பத்திரிக்கு கொண்டு சென்றனர். பரிசோதித்த டாக்டர்கள் ஏற்கனவே சத்யசாய் இறந்துவிட்டதாக தெரிவித்தனர்.

இதனை கேட்டு அவரது நண்பர்கள் கதறி துடித்தனர். சத்யசாய் எப்படி இறந்தார் என்பது மர்மமாக உள்ளது. அவர் நல்ல உடல் நலத்துடன் இருந்து உள்ளார்.

இந்த நிலையில் திருமண வரவேற்பு நிகழ்ச்சியில் நடனமாடியபோது அவர் திடீரென மயங்கி விழுந்து உயிரிழந்த சம்பவம் பெரும் சோகத்தை ஏற்படுத்தி உள்ளது. சத்யசாய் உடல் பிரேதபரிசோதனைக்காக கீழ்ப்பாக்கம் அரசு ஆஸ்பத்திரியில் வைக்கப்பட்டு உள்ளது. பிரேத பரிசோதனை முடிவு வந்த பின்னரே அவர் எப்படி இறந்தார் என்பது தெரிய வரும் என்று போலீசார் தெரிவித்தனர்.

மாணவர் சத்யசாய் இறந்தது தொடர்பாக ஆந்திராவில் உள்ள அவரது பெற்றோருக்கு தகவல் தெரிவிக்கப்பட்டது. அவர்கள் மகனின் உடலை பார்த்து கதறி அழுதது பரிதாபமாக இருந்தது.

இதுகுறித்து கோயம்பேடு பஸ் நிலைய போலீசார் வழக்குப்பதிவு செய்து விசாரணை நடத்தி வருகின்றனர். திருமண நிகழ்ச்சியில் நடனமாடிய என்ஜினீயரிங் மாணவர் சுருண்டு விழுந்து இறந்த சம்பவம் அவரது நண்பர்களிடையே பெரும் சோகத்தை ஏற்படுத்தி உள்ளது.