பொள்ளாச்சி பாலியல் சம்பவத்தை கண்டித்து திருச்சியில் விவசாயிகள்- வக்கீல்கள் ஆர்ப்பாட்டம்

திருச்சி:

பொள்ளாச்சி பாலியல் வன்கொடுமையை கண்டித்து திருச்சியில் விவசாயிகள், பெண் வக்கீல்கள் ஆர்ப்பாட்டம் நடத்தினர். திருச்சி மாவட்ட கலெக்டர் அலுவலகம் அருகே தமிழக விவசாயிகள் சங்கம் மற்றும் பொதுநல அமைப்புகள் சார்பில் ஆர்ப்பாட்டம் நடைபெற்றது.

ஆர்ப்பாட்டத்துக்கு மாவட்ட தலைவர் சின்னதுரை தலைமை தாங்கினார். விவசாய சங்க நிர்வாகி கண்ணன் முன்னிலை வகித்தார்.

இதில் சமூகநீதி பேரவையை சேர்ந்த ரவிகுமார், மக்கள் பாதுகாப்பு மைய வக்கீல் கென்னடி, தமிழ்தேசிய பேரியக்க நிர்வாகி கவித்துவன், மக்கள் அதிகாரம் அமைப்பை சேர்ந்த செழியன், ராஜா, மக்கள் கலை இலக்கிய கழக நிர்வாகி ஜீவா, பெண்கள் முன்னேற்ற இயக்க நிர்வாகி அருள் ஆக்னஸ் உள்பட பலர் கலந்து கொண்டனர்.

ஆர்ப்பாட்டத்தின்போது, மாயமான சமூக ஆர்வலர் முகிலனை போலீசார் கண்டுபிடித்து கொடுக்க வேண்டும் , பொள்ளாச்சி பாலியல் சம்பவத்தின் பின்னணியில் எந்த அரசியல் கட்சியினர் இருந்தாலும் அவர்களையும் போலீசார் கைது செய்திட வேண்டும், நியூட்ரினோ திட்டத்தை ரத்து செய்திட வேண்டும் என்பன உள்ளிட்ட கோரிக்கைகளை வலியுறுத்தி கோ‌ஷம் எழுப்பப்பட்டது. விவசாயிகள் சிலர் கருப்பு கொடியுடன் பங்கேற்றனர்.

இதேபோல, திருச்சி கண்டோன்மெண்டில் உள்ள ஒருங்கிணைந்த நீதிமன்ற வளாக நுழைவு வாயில் முன்பு தமிழ்நாடு முற்போக்கு பெண் வக்கீல்கள் சங்கம் சார்பில், ஆர்ப்பாட்டம் நடைபெற்றது. இதற்கு சங்கத்தின் தலைவி பானுமதி தலைமை தாங்கினார். ஆர்ப்பாட்டத்தில் விஜயலட்சுமி, பிரியா, பாரதி, வளர்மதி உள்பட பலர் கலந்து கொண்டனர்.

அப்போது, பாலியல் வன்கொடுமையில் நேரடியாகவும், மறைமுகமாகவும் ஈடுபட்ட அனைவரையும் குண்டர் சட்டத்தில் கைது செய்திட வேண்டும் உள்ளிட்ட கோரிக்கைகளை வலியுறுத்தி பெண் வக்கீல்கள் கோ‌ஷமிட்டனர்.

அப்போது வக்கீல் சங்க தலைவி பானுமதி கூறியதாவது:-

பொள்ளாச்சியில் பெண்கள் மீதான பாலியல் வன்கொடுமை வழக்கை சி.பி.ஐ.விசாரிக்க தேவையில்லை. ஏனென்றால், அது மத்திய அரசின் கட்டுப்பாட்டில் உள்ள ஒரு அமைப்பு. எனவே, ஐகோர்ட்டு நீதிபதி தலைமையில் சிறப்பு புலனாய்வுக்குழு அமைத்து விசாரிக்க வேண்டும். பாதிக்கப்பட்ட பெண்களிடம் புகார் பெறுதல், சாட்சிகள் விசாரணை, ஆவணங்களை கைப்பற்றுதல் குற்றவாளியின் பெயர் விவரங்கள் தவிர, ஏனைய விவரங்களை ரகசியமாக வைத்திருக்க வேண்டும்.

புலன் விசாரணைக் குழுவில் திறமையான பெண் போலீஸ் அதிகாரிகளை நியமிக்க வேண்டும். முகநூல், வாட்ஸ் அப் போன்ற சமூக ஊடகங்களில் பாலியல் வன்கொடுமை காட்சிகள், ஆபாச வீடியோக்கள் வெளியாவதை தடை செய்ய வேண்டும். இச்சம்பவம் தொடர்பான விசாரணையை விரைவாக முடித்து குற்றவாளிகளுக்கு அதிகபட்ச தண்டனை வழங்க வேண்டும் .

இவ்வாறு அவர் தெரிவித்தார். #PollachiAbuseCase