தி.மு.க. தொண்டர்களுக்கு மு.க.ஸ்டாலின் நேரில் ஆறுதல்

சென்னை:

ஆர்.கே.நகரில் நேற்று முன்தினம் நடந்த மோதலில் தி.மு.க. தொண்டர்கள் தாக்கப்பட்டனர். அரசு ஆஸ்பத்திரியில் சிகிச்சை பெற்று வரும் தி.மு.க. தொண்டர் களை தி.மு.க. செயல் தலைவர் மு.க.ஸ்டாலின் நேற்று சந்தித்து, ஆறுதல் கூறினார். பின்னர் அவர் நிருபர்களிடம் கூறியதாவது:-

ஆர்.கே.நகரில் நடந்த சம்பவத்தில் பார்த்தசாரதி, அப்பாஸ், குலசேகரன் ஆகிய மூன்று பேரும் தாக்கப்பட்டு ஸ்டான்லி மருத்துவமனையில் அனுமதிக்கப்பட்டு இருக்கிறார்கள். அவர்கள் மூவருக்கும் தலையில் வெட்டுப்பட்டு இருக்கிறது. ஒருவருக்கு 12 தையல்களும், ஒருவருக்கு 16 தையல்களும் போடப்பட்டு, உயிருக்குப் போராடும் நிலையில் இருக்கிறார்கள். குற்றவாளி என்று நிரூபிக்கப்பட்டு சிறையில் இருக்கக்கூடிய சசிகலாவின் தலைமையில் இயங்கிக் கொண்டிருக்கக்கூடிய பெரா அணியை சேர்ந்தவர்கள் ஆர்.கே.நகர் தொகுதியில் ஒவ்வொரு வாக்காளருக்கும் 4,000 ரூபாய் வீதம் பணம் கொடுக்கும் பணியில் ஈடுபட்டு இருக்கிறார்கள்.

ஆர்.கே.நகர் தொகுதியில் 6 காவல்நிலையங்கள் இருக்கின்றன. அவற்றில் எக்ஸ்-6 என்ற ஒரே காவல் நிலையத்தில் மட்டும் இதுவரை 28 புகார்களை தி.மு.க. சார்பில் தந்திருக்கிறார்கள். ஏறக்குறைய ஒரு கோடி ரூபாய் அளவுக்கு பணம் பறிமுதல் செய்யப்பட்டு, காவல்நிலையத்தில் ஒப்படைக்கப்பட்டு இருக்கிறது.

அஜீஸ் நகரில் மட்டும், பெரா அணியை சார்ந்த, கோபிசெட்டிபாளையம் பகுதியைச் சேர்ந்த அ.தி.மு.க.வினர் பணம் கொடுக்க முயன்றபோது அவர்களிடம் இருந்து சுமார் 9,80,000 ரூபாய் கைப்பற்றி, காவல் நிலையத்தில் எங்களுடைய தொண்டர்கள் முறைப்படி ஒப்படைத்து உள்ளனர். இதையெல்லாம் பார்க்கின்றபோது, ஆர்.கே.நகர் இடைத்தேர்தலில் பெரா அணியை சேர்ந்தவர்கள் எப்படியாவது டெபாசிட் தொகையையாவது காப்பாற்றிக் கொள்ள வேண்டும் என்ற நிலையில், ஜனநாயகத்தை படுகுழிக்கு தள்ளி, பணநாயகத்தின் மூலம் வெற்றி பெறலாம் என்ற உணர்வோடு, பணம் கொடுக்கும் முயற்சியில் ஈடுபட்டு இருக்கின்றார்கள்.

இந்த செய்தியை அறிந்ததும் தலைமைக் கழகத்தின் சார்பில் நான் சென்னை மாநகரத்தின் பொறுப்பு கமிஷனராக இருக்கக்கூடியவரிடத்தில் தொலைபேசி மூலம் பேசினேன். அதன் பிறகு தேர்தல் ஆணையர் ராஜேஷ் லக்கானியிடம் தொலைபேசி மூலம் பேசியிருக்கிறேன். மாநகராட்சியின் கமிஷனர் கார்த்திகேயனிடமும் தொலைபேசி மூலம் பேசினேன். அனைவரும் ‘நடவடிக்கை எடுக்கிறோம்’, என்று சொல்கிறார்களே தவிர, இதுவரை எந்த நடவடிக்கையும் எடுத்ததாக எங்களுக்கு தெரியவில்லை. பொதுமக்களும், கழக தோழர்களும் பணம் கொடுக்க வரும் சசிகலா அணியை சேர்ந்தவர்களை பிடித்துத் தருகின்றபோது, காவல்துறையினர் ஒப்புக்காக அவர்களை அழைத்துச் செல்வது போல் கொண்டு சென்று வெளியில் விடும் நிலைதான் தொடர்கிறது.

டெல்லியில் இருக்கின்ற தேர்தல் ஆணையம் இடைத்தேர்தலை முறையாக நடத்த வேண்டுமென்று நினைத்துக் கொண்டிருந்தாலும், இங்கிருக்கக்கூடிய தேர்தல் ஆணையத்தில் இருக்கக்கூடியவர்கள், காவல்துறையை சார்ந்தவர்கள் பெரா அணிக்கு கைக்கூலிகளாக இருந்து இதையெல்லாம் வேடிக்கை பார்த்துக் கொண்டிருக் கிறார்கள் என்றுதான் எண்ணத் தோன்றுகிறது. எனவே, இதுகுறித்து தலைமைத் தேர்தல் ஆணையத்துக்கு நாங்கள் புகார் அனுப்ப இருக்கின்றோம்.

அதுமட்டுமல்ல, நீதிமன்றத்திலும் இதுகுறித்து வழக்கு தொடர நடவடிக்கை எடுக்கப்பட்டு வருகிறது. ஆனால், என்னதான் இவர்கள் பணத்தின் மூலமாக வாக்குகளைப் பெற்று விடலாம் என்று நினைத்துக் கொண்டிருந்தாலும், நிச்சயமாக பெரா அணியாக இருந்தாலும், ஓ.பி.எஸ். தலைமையில் உள்ள மணல் மாபியா அணியாக இருந்தாலும், இரு அணிகளும் இந்த தேர்தலில் மண்ணைக் கவ்வும், டெபாசிட்டை இழக்கும் நிலைதான் ஏற்படும் என்பது உறுதி.

ஆகவே, இந்த தேர்தலின் மூலமாக தமிழ்நாட்டில் ஆட்சி மாற்றம் நிச்சயமாக உருவாகப்போகிறது. நேற்றைக்கும், இன்றைக்கும் நடந்து கொண்டிருக்கக்கூடிய சம்பவங்களுக்கும், முறையாக நடவடிக்கை எடுக்கும் நிலையில் இல்லாத அதிகாரிகளை எல்லாம் நாங்கள் கண்காணித்துக் கொண்டிருக்கிறோம். அப்படி ஆட்சி மாற்றம் ஏற்படும் நேரத்தில் உரிய நடவடிக்கையை உறுதியாக எடுப்போம் என்பதை நான் தெரிவித்துக் கொள்கிறேன். முறைகேடுகளுக்கு உடந்தையாக இங்கிருக்கக்கூடிய கைக்கூலிகள் மீது வரவிருக்கும் காலகட்டத்தில் உரிய நடவடிக்கை எடுப்போம்.

இந்த இடைத்தேர்தலை நடத்துகிறார்களா அல்லது ரத்து செய்கிறார்களா என்பது எங்களுடைய பிரச்சினையல்ல. ஜனநாயகப்படி தேர்தலை நடத்த வேண்டும். அவர்களால் டெபாசிட் கூட வாங்க முடியாது என்ற நிலை இருப்பதால் தான், பணம் கொடுத்து வருகிறார்கள். டெபாசிட் வாங்குவதற்காக பணம் கொடுக்கிறார்களா அல்லது தேர்தல் ஆணையம் நடவடிக்கை எடுத்து தேர்தலை நிறுத்துவதற்கான முயற்சியில் ஈடுபடுகிறார்களா என்ற சந்தேகமும் எங்களுக்கு வந்திருக்கிறது.

இவ்வாறு அவர் தெரிவித்தார்.