டி.என்.பி.எல். தகுதிச்சுற்று-1: திருச்சி வாரியர்ஸ் அணிக்கு 154 ரன்கள் வெற்றி இலக்காக நிர்ணயித்தது சேப்பாக் சூப்பர் கில்லீஸ்

தமிழ்நாடு பிரிமீயர் லீக் டி20 தொடரில் இன்று தகுதிச்சுற்று-1 போட்டி நடைபெற்று வருகிறது. இதில் திருச்சி வாரியர்ஸ்- சேப்பாக் சூப்பர் கில்லீஸ் அணிகள் பலப்பரீட்சை நடத்தி வருகின்றன. டாஸ் வென்ற திருச்சி வாரியர்ஸ் பந்து வீச்சை தேர்வு செய்தது.

அதன்படி சேப்பாக் சூப்பர் கில்லீஸ் அணியின் கவுசிக் காந்தி, என். ஜெகதீசன் ஆகியோர் தொடக்க வீரர்களாக களம் இறங்கினர். முதல் ஓவரை சுனில் சாம் வீசினார். ஜெகதீசன் முதல் ஓவரில் இரண்டு பவுண்டரிகள் விரட்டினார்.

2-வது ஓவரை சரவணன் குமார் வீசினார். இந்த ஓவரின் 4-வது பந்தில் கவுசிக் காந்தி க்ளீன் போல்டானார். அவர் 3 பந்தில் 1 ரன் எடுத்து வெளியேறினார். அடுத்து எஸ். ராதாகிருஷ்ணன் களம் இறங்கினார். இந்த ஓவரில் சேப்பாக் அணிக்கு 2 ரன்களே கிடைத்தது.

3-வது ஓவரை சுனில் சாம் வீசினார். இந்த ஓவரில் ராதாகிருஷண்ன் ஒரு பவுண்டரி அடித்தார். 4-வது ஓவரை சரவணன் குமார் வீசினார். இந்த ஓவரின் 2-வது பந்தில் என். ஜெகதீசன் க்ளீன் போல்டானார். ஜெகதீசன் 13 பந்தில் 14 ரன்கள் எடுத்து ஆட்டமிழந்தார்.

சேப்பாக் சூப்பர் கில்லீஸ் 4 ஓவரில் 25 ரன்கள் எடுப்பதற்குள் 2 முக்கிய விக்கெட்டுகளை இழந்தது.  3-வது விக்கெட்டுக்கு ராதாகிருஷ்ணன் உடன் சசிதேவ் ஜோடி சேர்ந்தார். இந்த ஜோடி சேப்பாக் அணியை சரிவில் இருந்து மீட்டது.

பவர் பிளேயின் கடைசி ஓவரான 6-வது ஓவரை சரவணன் குமார் வீசினார். இந்த ஓவரில் ராதாகிருஷ்ணன் 2 சிக்ஸ், ஒரு பவுண்டரி விளாசினார். இந்த ஓவரில் 18 ரன்கள் கிடைக்க  சேப்பாக் சூப்பர் கில்லீஸ் பவர் பிளேயில் 2 விக்கெட் இழப்பிற்கு 49 ரன்கள் சேர்த்தது.

அதன்பின் சேப்பாக் சூப்பர் கில்லீஸ் அணியின் ரன் விகிதத்தில் வேகம் குறைந்தது. 10 ஓவரில் 2 விக்கெட் இழப்பிற்கு 73 ரன்கள் எடுத்தது. ராதாகிருஷ்ணன் அரைசதம் நோக்கிச் சென்றார். அவருக்கு சசிதேவ் துணையாக இருந்தார். 12.5 ஓவரில் 89 ரன்கள் எடுத்திருக்கும்போது இந்த ஜோடி பிரிந்தது. மதிவாணன் பந்தில் சசிதேவ் 29 பந்தில் 23 ரன்கள் எடுத்து ஆட்டமிழந்தார்.

4-வது விக்கெட்டுக்கு ராதாகிருஷ்ணன் உடன் ஆர். சதீஷ் ஜோடி சேர்ந்தார். 14-வது ஓவரின் 3-வது பந்தை சிக்சருக்கு தூக்கி 35 பந்தில் அரைசதம் அடித்தார் ராதாகிருஷ்ணன். சேப்பாக் சூப்பர் கில்லீஸ் 15 ஓவரில் 3 விக்கெட் இழப்பிற்கு 106 ரன்கள் எடுத்தது.

சேப்பாக் அணி 16-வது ஓவரில் 8 ரன்களும், 17-வது ஓவரில் 10 ரன்களும், 18-வது ஓவரில் 9 ரன்களும் சேர்த்தது. 19-வது ஓவரில் 9 ரன்களும் சேர்த்தது.  இதனால் 19 ஓவரில் சேப்பாக் சூப்பர் கில்லீஸ் 142 ரன்கள் சேர்த்தது.

கடைசி ஓவரில் 11 ரன்கள் கிடைக்க சேப்பாக் சூப்பர் கில்லீஸ் 20 ஓவரில் 3 விக்கெட் இழப்பிற்கு 153 ரன்கள் எடுத்துள்ளது. ராதாகிருஷ்ணன் 54 பந்தில் 82 ரன்களும், சதீஷ் 22 பந்தில் 29 ரன்களும் எடுத்து ஆட்டமிழக்காமல் இருந்தனர்.