துப்பாக்கி சுடுதல்- இந்திய வீரர் சவுரப் சவுத்ரி இறுதிப்போட்டிக்கு தகுதி

டோக்கியோ:

32-வது ஒலிம்பிக் போட்டி ஜப்பான் தலைநகர் டோக்கியோவில் நடைபெற்று வருகிறது.

இன்று காலை நடந்த பெண்களுக்கான 10 மீட்டர் ஏர் ரைபிள் பிரிவில் இந்திய வீராங்கனைகள் இளவேனில் வாலறிவன், அபூர்வி சண்டிலா ஆகியோர் ஏமாற்றம் அடைந்தனர். இருவராலும் இறுதி சுற்றுக்கு முன்னேற முடியாமல் போனது பரிதாபமே.

ஆண்களுக்கான 10 மீட்டர் ஏர் பிஸ்டல் தகுதிச்சுற்றில் இந்திய வீரர்கள் சவுரப் சவுத்ரி, அபிஷேக் வர்மா ஆகியோர் பங்கேற்றனர்.

6 சுற்றுகளை கொண்ட தகுதிச்சுற்றில் சவுரப் சவுத்ரி சிறப்பாக செயல்பட்டு 586.28 புள்ளிகள் பெற்று முதல் இடத்தை பிடித்து இறுதிப்போட்டிக்கு தகுதி பெற்றார். அவர் 4-வது வாய்ப்பில் 100 புள்ளிகளை எடுத்து முத்திரை பதித்தார்.

மற்றொரு இந்திய வீரரான அபிஷேக் வர்மாவால் இறுதிச் சுற்றுக்கு முன்னேற முடியவில்லை. அவர் 575.19 புள்ளிகள் பெற்று 17-வது இடத்தை பிடித்தார். முதல் 8 இடங்களை பிடிப்பவர்கள் மட்டுமே இறுதிப்போட்டிக்கு தகுதி பெற முடியும்.

சீனாவை சேர்ந்த 2 வீரர்களும், ஜெர்மனி, உக்ரைன், ஈரான், கொரியா, செர்பியாவை சேர்ந்தவர்களும் இறுதிப்போட்டிக்கு தகுதி பெற்றனர்.