அபு தாபி கிரிக்கெட் சங்கம் மூன்று நாட்களே கொண்ட டி20 லீக் தொடரை நடத்துகிறது. முதன்முறையாக நடத்தப்படும் இந்த தொடர் வரும் அக்டோபர் மாதம் 4-ந்தேதி முதல் 6-ந்தேதி வரை நடக்கிறது. இங்கிலாந்து, தென்ஆப்பிரிக்கா, ஆப்கானிஸ்தான், பாகிஸ்தான் மற்றும் ஆஸ்திரேலியாவில் நடத்தப்படும் டி20 லீக்கில் விளையாடும் 6 அணிகள் இதில் பங்கேற்கின்றன.
இந்த தொடரை நடத்த எமிரேட்ஸ் கிரிக்கெட் போர்டு மற்றும் ஐசிசி அனுமதி அளித்துள்ளது. இங்கிலாந்தில் இருந்து யார்க்ஷைர் விகிங்ஸ் அணியும், தென்ஆப்பிரிக்காவில் இருந்து மல்டிபிளை டைட்டன்ஸ் அணியும், ஆப்கானிஸ்தானில் இருந்து ஷ்பாகீசா லீக் அணியும், பாகிஸ்தானில் இருந்து லாகூர் குவாலண்டர்ஸ் அணியும், ஆஸ்திரேலியாவில் இருந்து ஹோபர்ட் ஹரிகேன்ஸ் அணியும் இடம்பிடித்துள்ளது.
இதில் வெஸ்ட் இண்டீஸ் அணியின் சிக்சர் மன்னான கிறிஸ் கெய்ல், இங்கிலாந்தின் தைமல் மில்ஸ், கேரி பேலன்ஸ், பாகிஸ்தானின் யாசிர் ஷா, தென்ஆப்பிரிக்காவின் பெஹார்டியன், அல்பி மோர்கல் ஆகியோர் விளையாட இருக்கிறார்கள்.
