பெண்கள் ஹாக்கி: இந்திய அணி மீண்டும் தோல்வி

ஒலிம்பிக் பெண்கள் ஹாக்கி போட்டியில் இந்திய அணி “பீ” பிரிவில் இடம் பெற்று உள்ளது. தொடக்க ஆட்டத்தில் ஜப்பான் அணியும் 2-2 என்ற கோல் கணக்கில் டிரா செய்தது. 2-வது ஆட்டத்தில் இங்கிலாந்திலும் 0-3 என்ற கணக்கிலும் 3-வது போட்டியில் ஆஸ்திரேலியாவிடம் 1-6 என்ற கோல் கணக்கிலும் தோல்வி அடைந்தது.

இந்திய அணி 4-வது லீக் ஆட்டத்தில் அமெரிக்காவுடன் மோதியது. இந்த ஆட்டம் இந்திய நேரப்படி நேற்று நள்ளிரவு நடந்தது. இதில் அமெரிக்க அணியினர் தாக்குதல் ஆட்டத்தில் ஈடுபட்டு இந்திய வீராங்கனைகளுக்கு கடும் நெருக்கடி கொடுத்தனர்.

அமெரிக்க வீராங்கனை கேத்லீன் 14-வது நிமிடத்திலும், 42-வது நிமிடத்திலும் கோல் அடித்தார். 52-வது நிமிடத்தில் மெலிஸ்சா 3-வது கோலை அடித்தார். இறுதி வரை இந்திய அணியால் ஒரு கோல் கூட அடிக்க முடியவில்லை. ஆட்டம் முடிவில் அமெரிக்கா 3-0 என்ற கோல் கணக்கில் இந்தியாவை வீழ்த்தியது.

இந்திய அணி இதுவரை 4 போட்டியில் 3 தோல்வி, ஒரு டிராவுடன் ஒரு புள்ளியுடன் உள்ளது. கடைசி லீக் ஆட்டத்தில் அர்ஜென்டினாவுடன் நாளை மோதுகிறது.

காலிறுதிக்கு தகுதி பெற வேண்டும் என்றால் நாளைய மிகப்பெரிய கோல் வித்தியாசத்தில் வெற்றி பெற வேண்டியது அவசியம்.