ஊக்க மருந்து விவகாரத்தால் சிக்கி தவித்த ரஷ்யாவிற்கு முதல் தங்கத்தை வாங்கி கொடுத்த ஜூடோ வீரர்

ரியோ ஒலிம்பிக் தொடர் தொடங்குவதற்கு முன் ரஷியா ரியோ ஒலிம்பிக்கில் கலந்து கொள்ளுமா? என்ற கேள்வி எழும்பியது. தடகள போட்டிகளில் விளையாடும் வீரர்- வீராங்கனைகள் தடை செய்யப்பட்ட ஊக்கமருந்தை எடுத்துக்கொள்வதற்கு ரஷிய அரசே உதவி செய்தது என்று குற்றச்சாட்டு எழுந்தது.

இதனால் ரஷியா ரியோ ஒலிம்பிக்கில் கலந்து கொள்ள தடை விதிக்க வேண்டும் என்றும் கனடா, இங்கிலாந்து போன்ற நாடுகள் வலியுறுத்தின. ஆனால், சர்தேச ஒலிம்பிக் அமைப்பு ரஷியாவிற்கு தடைவிதிக்க மறுத்து விட்டது. மேலும், அந்தந்த விளையாட்டு பிரிவுகளின் தலைமை அமைப்புகள் ரஷிய வீரர்கள் கலந்து கொள்வது குறித்து முடிவு எடுத்துக் கொள்ளலாம் என்று கூறியது. இதனால் பல வீரர்கள் கலந்து கொள்ள முடியாத நிலையில், 200-க்கும் மேற்பட்ட வீரர்கள் கலந்து கொண்டார்கள்.

நேற்று ஆண்களுக்கான ஜூடோ போட்டி (60 கிலோ எடைப்பிரிவு) நடைபெற்றது. இதில் ரஷியா சார்பில் பெஸ்லான் மட்ரானவ் கலந்து கொண்டார். இதில் கஜகஜஸ்தான் வீரர் யெல்டோஸ் ஸ்மெடோவை வீழ்த்தி தங்கம் வென்றார். அத்துடன் முதல் நாளிலேயே ரஷிய அணியை பதக்க பட்டியலில் இடம்பெறச் செய்தார்.

இந்த வெற்றி குறித்து ஸ்லான் மட்ரானவ் கூறுகையில் ‘‘எங்கள் நாட்டிற்கு உளவியல் ரீதியான அழுத்தம் அதிக அளவில் இருந்தது. ஆகவே, முதல் நாளில் இந்த தங்க பதக்கம் வென்றது என்னுடைய நாட்டிற்கு முக்கியத்துவம் வாய்ந்தது’’ என்றார்.