கன்னட சூப்பர்ஸ்டார் புனித் ராஜ்குமார் அக்டோபர் 29 ஆம் தேதி மாரடைப்பு காரணமாக உயிரிழந்தார். இவரது மரணம் திரையுலகினர் மட்டுமின்றி அனைவர் மத்தியிலும் கடும் அதிர்ச்சியை ஏற்படுத்தி இருக்கிறது. புனித் ராஜ்குமார் உயிரிழக்க இரண்டு மணி நேர கடுமையான உடற்பயிற்சி தான் காரணம் என கூறப்படுகிறது.
இந்த நிலையில், பிரபல இதயவியல் நிபுணர் மருத்துவர் தேவி ஷெட்டி கூறியதாக பகீர் தகவல் ஒன்று சமூக வலைதளங்களில் வைரலாகி வருகிறது. வைரல் பதிவுகளில், கட்டுக்கோப்பாக இருக்க அதிகளவு மெனக்கெடுதல் தான் புனித் ராஜ்குமார் உயிரிழக்க காரணம் என குறிப்பிடப்பட்டு இருக்கிறது. வைரல் தகவல் வாட்ஸ்அப் மற்றும் பேஸ்புக்கில் பகிரப்பட்டு வருகிறது.
இதுகுறித்த இணைய தேடல்களில், வைரல் தகவலை மருத்துவர் தேவி ஷெட்டி வெளியிடவில்லை என தெரியவந்துள்ளது. வைரல் பதிவுகளை தொடர்ந்து நாரயணா ஹெல்த் குழுமம் சார்பில் அறிக்கை வெளியிடப்பட்டது. அதில் மருத்துவர் தேவி ஷெட்டி நடிகர் புனித் ராஜ்குமார் மறைவு குறித்து இதுபோன்ற தகவலை பதிவிடவில்லை என குறிப்பிடப்பட்டு இருக்கிறது.
முன்னதாக மருத்துவர் தேவி ஷெட்டி தொலைகாட்சி விவாதம் ஒன்றில் கலந்து கொண்டு பேசினார். அப்போது அவர் ராஜ்குமார் மறைவு குறித்து எந்த கருத்தையும் தெரிவிக்க மாட்டேன் என தெரிவித்துவிட்டார். அந்த வகையில் மருத்துவர் தேவி ஷெட்டி வெளியிட்டதாக வைரலாகும் தகவலை அவர் வெளியிடவில்லை என்பது உறுதியாகிவிட்டது.
