ஜெயங்கொண்டம்:
அரியலூர் மாவட்டம் ஜெயங்கொண்டம் அருகே உடையார்பாளையத்தை சேர்ந்தவர் செல்வராஜ். இவர் கடந்த 10 வருடங்களாக ஸ்ரீபுரந்தான் அரசு மேல்நிலைப் பள்ளியில் தலைமை ஆசிரியராக பணிபுரிந்து வந்தார். இவர் கடந்த 5-ந் தேதி மாலை பள்ளி முடிந்து தனது இருசக்கர வாகனத்தில் வீட்டிற்கு சென்று கொண்டிருக்கும் போது உடையார்பாளையம் த.சோழங்குறிச்சி சாலையில் மர்மமான முறையில் இறந்து கிடந்தார்.
இதுகுறித்து செல்வராஜ் மனைவி உஷாராணி உடையார்பாளையம் போலீசில் புகார் செய்தார். அதன் பேரில் போலீசார் வழக்கு பதிவு செய்து விசாரணை நடத்தி வந்தனர். மேலும் மாவட்ட காவல் கண்காணிப்பாளர் பெரோஸ்கான் அப்துல்லா உத்தரவின்பேரில் ஜெயங்கொண்டம் காவல் ஆய்வாளர் மற்றும் உதவி ஆய்வாளர் வசந்த் தலைமையில் தனிப்படைகள் அமைக்கப்பட்டு விசாரணை நடைபெற்று வந்தது.
இந்நிலையில் ஜெயங்கொண்டம் காவல் ஆய்வாளர் தலைமையிலான தனிப்பிரிவு படையினர் சோழங்குறிச்சி சிவன்கோவில்அருகே வாகன சோதனையில் ஈடுபட்டிருந்தனர். அப்போது சந்தேகத்தின் பேரில் விசாரணை செய்து கொண்டிருந்த போது திடீரென ஒருவர் தப்பி ஓட முயன்றார். உடனே போலீசார் துரத்திச் சென்று அந்த வாலிபரை விரட்டிப் பிடித்து உடையார்பாளையம் காவல் நிலையத்திற்கு அழைத்துச் சென்று விசாரணையில் ஈடுபட்டனர்.
விசாரணையில் அவர் ஜெயங்கொண்டம் காமராஜபுரம் வடக்கு தெருவை சேர்ந்த வெங்கடேசன் (வயது 23) என்பது தெரியவந்தது. மேலும் விசாரணையில் தனது பணத்தேவைக்காக பள்ளி முடிந்து இருசக்கர வாகனத்தில் வந்த தலைமை ஆசிரியர் செல்வராஜை வழிமறித்து வழிப்பறியில் ஈடுபட்ட போது, தலைமை ஆசிரியர் தர மறுக்கவே வெங்கடேசன் கோபத்தில் தான் வைத்திருந்த பட்டாக்கத்தியால் தலைமை ஆசிரியரை தாக்கிஉள்ளதாகவும், அவர் அதே இடத்தில் உயிரிழந்ததாகவும், அப்போது அந்த வழியாக வாகனங்கள் மற்றும் ஆட்கள் வந்ததால் வெங்கடேசன் உடனடியாக, தனது இருசக்கர வாகனத்தை எடுத்துக் கொண்டு தப்பிச் சென்றதும் தெரிய வந்தது.
மேலும் வெங்கடேசனிடமிருந்து பட்டாக்கத்தி மற்றும் இருசக்கர வாகனம் பறிமுதல் செய்யப்பட்டு மேற்கொண்டு போலீசார் விசாரணை செய்து வருகின்றனர்.
