ஈரோடு:
ஈரோடு மாவட்ட மக்களின் குடிநீர் ஆதாரமாகவும், விவசாயிகளின் வாழ்வாதாரமாக உள்ளது பவானிசாகர் அணை. 105 அடி கொள்ளளவு கொண்ட பவானிசாகர் அணையின் முக்கிய நீர்பிடிப்பு பகுதியாக நீலகிரி மலைப் பகுதி உள்ளது. கடந்த சில நாட்களாக நீர்ப்பிடிப்பு பகுதியில் பரவலாக மழை பெய்து வருவதால் பவானிசாகர் அணைக்கு நீர்வரத்து அதிகரித்து வருகிறது.
இதனால் அணையின் நீர்மட்டம் தொடர்ந்து 102 அடியில் இருந்து வருகிறது. அணையின் விதிப்படி 102 அடியை எட்டியதும் அணைக்கு வரும் உபரி நீர் அப்படியே திருப்பி விடப்படுவது வழக்கம். இந்நிலையில் இன்று 7-வது நாளாக பவானிசாகர் அணை 102 அடியில் உள்ளது. இன்று காலை நிலவரப்படி பவானிசாகர் அணையின் நீர்மட்டம் 102 அடியில் உள்ளது. அணைக்கு 2,814 கனஅடி வீதம் தண்ணீர் வந்து கொண்டிருக்கிறது. அணையிலிருந்து கீழ்பவானி வாய்க்காலுக்கு 2,300 கன அடியும், குடிநீருக்காக பவானி ஆற்றுக்கு 500 கன அடி என மொத்தம் 2 ஆயிரத்து 800 கன அடி நீர் வெளியேற்றப்பட்டு வருகிறது.
