சிப்காட் (ராணிப்பேட்டை):
ராணிப்பேட்டையை அடுத்த அம்மூர் அருகே உள்ள கல்மேல்குப்பம் பகுதியை சேர்ந்தவர் பஷீரூனிஷா (வயது 55). இவர் தனது பேரன் சுபியான் (19) என்பவரின் மோட்டார் சைக்கிளில் ராணிப்பேட்டையில் உள்ள தனியார் மருத்துவமனைக்கு நேற்று முன்தினம் இரவு சென்று கொண்டிருந்தார்.
அல்லிகுளம் கூட் ரோடு அருகே சென்றபோது, எதிரே வந்த மோட்டார் சைக்கிள் ஒன்று, சுபியான் ஓட்டி வந்த மோட்டார் சைக்கிள் மீது மோதியது. அந்த மோட்டார் சைக்கிள் அதே சாலையில் மேல்விஷாரத்தை சேர்ந்த அன்சர் பாஷா (45) என்பவர் வந்த மோட்டார் சைக்கிள் மீதும் மோதிவிட்டு நிற்காமல் சென்று விட்டது. இதில் சுபியான் ஓட்டி வந்த மோட்டார்சைக்கிள் கீழே விழுந்தது.
அந்த மோட்டார்சைக்கிளில் பின்புறம் அமர்ந்து சென்ற பஷீரூனிஷா பலத்த காயமடைந்தார். இதேபோல் மற்றொரு மோட்டார் சைக்கிளில் வந்த அன்சர் பாஷாவிற்கும் காயம் ஏற்பட்டது.
அந்த பகுதியில் இருந்தவர்கள் அவர்களை மீட்டு ஆட்டோ மூலம் வாலாஜாவில் உள்ள அரசு மருத்துவமனைக்கு சிகிச்சைக்காக கொண்டு சென்றனர். பஷீரூனிஷாவை டாக்டர்கள் பரிசோதித்தபோது இறந்துவிட்டதாக தெரிவித்தனர்.
மற்றொரு நபரான அன்சர் பாஷா மேல் விஷாரத்தில் உள்ள தனியார் மருத்துவமனைக்கு சிகிச்சைக்காக கொண்டு செல்லப்பட்டார். இந்த விபத்து குறித்து ராணிப்பேட்டை போலீசார் வழக்குப்பதிவு செய்து விசாரணை நடத்தி வருகின்றனர்.
