விருதுநகர்:
மாவட்டம் முழுவதும் தடுப்பூசி அரசு ஆஸ்பத்திரியிலும், ஆரம்ப சுகாதார நிலையங்களிலும் மற்றும் தடுப்பூசி முகாம்களில் தடுப்பூசி போடப்பட்டு வருகிறது. அங்குள்ள பணியாளர்கள், சுகாதார பணியாளர்கள் மற்றும் 60 வயதிற்கு மேற்பட்டோரில் தடுப்பூசி போடப்பட்ட நிலையில் 45 வயதுக்கு மேற்பட்டோருக்கு தடுப்பூசி போடப்பட்டது.
தற்போது 18 வயது முதல் 44 வயது வரை உள்ளவர்களுக்கு தடுப்பூசி போடப்படும் பணி நடைபெற்று வருகிறது. இதுவரை மாவட்டத்தில் 2 லட்சத்து 20 ஆயிரத்துக்கும் மேல் தடுப்பூசி போடப்பட்டுள்ளது. தொடர்ந்து தடுப்பூசி போடப்படும் பணி நடைபெற்று வருகிறது.
இந்தநிலையில் நேற்று முன்தினம் 3072 டோஸ் தடுப்பூசிகள் மட்டுமே இருப்பதாக மாவட்ட நிர்வாகம் தெரிவித்தது. இருப்பினும் தடுப்பூசி போடப்படும் பணி நடந்து வந்த நிலையில் நேற்று தடுப்பூசி மருந்து இல்லாதது குறித்து எந்தவித அறிவிப்பு இல்லாத நிலையில் நேற்றும் தடுப்பூசி போடப்படும் இடங்களில் பெருமளவில் தடுப்பூசி போடுவதற்காக ஆர்வத்துடன் பொது மக்கள் வந்தனர்.
அதிலும் குறிப்பாக இளைஞர்கள் அதிக எண்ணிக்கையில் வந்து இருந்தனர்.
ஆனால் தடுப்பூசி மருந்து இல்லாததால் அவர்கள் நீண்ட நேரம் காத்திருந்தும் தடுப்பூசி போட முடியாமல் திரும்பி செல்லவேண்டிய நிலை ஏற்பட்டது.
தடுப்பூசி மருந்து கையிருப்பு இல்லாத நிலையில் மாவட்ட நிர்வாகம் நேற்று முன்தினமே தடுப்பூசி மருந்து கையிருப்பில் இருந்து வந்தவுடன் தடுப்பூசி போடும் பணி தொடரும் என தெரிவித்திருந்தால் தடுப்பூசி முகாமிற்கு வந்திருக்க மாட்டார்கள்.
ஆனால் இதுபற்றி எந்த அறிவிப்பும் இல்லாத நிலையில் நேற்று பெருமளவிற்கு முகாம் நடைபெறும் இடத்திற்கும், அரசு ஆஸ்பத்திரிகளுக்கும் மக்கள் வந்தனர். இதுபற்றி உடனடியாக தெரிவித்து அவர்களை திருப்பி அனுப்பி இருக்கலாம். ஆனால் நீண்ட நேரம் காக்க வைத்து பின்பு போலீசார் வந்து தான் அவர்களை சமரசப்படுத்தி திருப்பி அனுப்ப வேண்டிய நிலை ஏற்பட்டது.
இதுபற்றி தொடர்புடைய மாவட்ட அதிகாரியிடம் கேட்டபோது தடுப்பூசி மருந்து சென்னையில் இருந்து அனுப்பி வைக்கப்பட்டுள்ளதாகவும் இன்று 15 ஆயிரம் டோஸ் தடுப்பூசி மருந்து வர உள்ளதால் இன்று முதல் தடுப்பூசி போடப்படும் என்றும் தெரிவித்தார்.
