மாமல்லபுரத்தில் மழை- கடல் சீற்றம்: மீனவர்கள் கடலுக்குள் செல்லவில்லை

மாமல்லபுரம்:

வங்ககடலில் உருவாகி உள்ள ‘நடா’ புயல் காரணமாக கடலோர பகுதிகளில் பலத்த மழை எச்சரிக்கை விடப்பட்டு உள்ளது. மாமல்லபுரத்தில் இன்று அதிகாலை முதல் மழை பெய்யத் தொடங்கியது.

நேரம் செல்லச்செல்ல பலத்த மழையாக கொட்டியது. கனமழை காரணமாக மாமல்லபுரம் கடற்கரை கோவில், புலிக்குகை குட வரைக்கோவில் ஐந்து ரதம் பகுதியில் தண்ணீர் தேங்கியது. சாலைகளிலும் தண்ணீர் பெருக்கெடுத்து ஓடியது.

மழை காரணமாக சாலைகளில் வாகன நடமாட்டம் இன்று வெறிச்சோடி காணப்பட்டது

மாமல்லபுரம் கடலில் சுழல் காற்றின் வேகம் தென்புறமாக அதிகரித்துள்ளது. நேற்று நள்ளிரவில் இருந்தே பலத்த காற்று வீச துவங்கியது. இதனால் இன்று கடல் அதிக சீற்றத்துடன் காணப்படுகிறது.

மீனவர்கள் யாரும் கடலுக்கு மீன்பிடிக்கச் செல்லவில்லை. புயல் வேகம் அதிகரிக்கும் சூழல் ஏற்பட்டால் கடலோரத்தில் வசிக்கும் மீனவர்கள் உடனடியாக பாதுகாப்பு பகுதிகளுக்கு சென்று விடும் படி மாவட்ட நிர்வாகம் அறிவுறுத்தி உள்ளது. மேலும் மாமல்லபுரத்தில் கடலோரப் பாதுகாப்புபடை வீரர்கள், தீயணைப்புபடை வீரர்கள், மழைக்கால மீட்பு பணி குழுவினர், பாதுகாப்பு உபகரணங்களுடன் தயார் நிலையில் உள்ளனர்.

கல்பாக்கம் அணுமின் நிலையத்தில் அவசர கால பாதுகாப்பு நடவடிக்கைகள் மேற்கொள்ளப்பட்டுள்ளது. புயல், சுனாமி நிலநடுக்கம் பற்றிய உலகளாவிய தகவல்களை ‘சென்டல் செல்’ கட்டுப்பாட்டு அறை மூலம் தீவிரமாக அதிகாரிகள் கண்காணித்து வருகிறார்கள்.

இதே போல் பழவேற்காடு கடல் பகுதியிலும் அலைகள் சீற்றம் அதிகமாக கணப்பட்டது. அதிவேகத்தில் கடல் காற்று வீசுகிறது. பழவேற்காடை சுற்றியுள்ள 33 கிராமத்தை சேர்ந்த 1000 க்கும் மேற்பட்ட மீனவர்கள் கடலுக்குள் மீன்பிடிக்க செல்லவில்லை. அவர்கள் தங்களது படகுகளை பாதுகாப்பாக நிறுத்தி வைத்து உள்ளனர்.