ராமநாதபுரம்:
உள்ளாட்சி அமைப்புகளுக்கான தேர்தலை முன்னிட்டு ராமநாதபுரம் மாவட்டத்தில் அனைத்து வாக்குச்சாவடி மையங்களிலும் வாக்காளர் பட்டியல் சுருக்க திருத்தம் சிறப்பு முகாம் நடைபெற்றது.
ராமநாதபுரம் நகரில் அறிஞர் அண்ணா நகராட்சி நடுநிலைப்பள்ளி, வள்ளல்பாரி நகராட்சி நடுநிலைப்பள்ளி, நகராட்சி பெண்கள் மேல்நிலைப் பள்ளி மற்றும் கீழக்கரை தாலுகாவில் திருப்புல்லாணி அரசு மேல்நிலைப்பள்ளி ஆகிய இடங்களில் உள்ள வாக்குச் சாவடி மையங்களில் நடைபெற்ற வாக்காளர் பட்டியல் சுருக்க திருத்த சிறப்பு முகாமினை மாவட்ட கலெக்டர் நடராஜன் பார்வையிட்டு ஆய்வு செய்தார்.
முகாமிற்கு வரும் பொது மக்களின் தேவை அறிந்து உரிய விண்ணப்பங்களை வழங்கி வாக்காளர் பட்டியல் சுருக்கத் திருத்தப் பணிகளை மேற்கொள்ள வேண்டுமெனவும், 25-ந்தேதி அன்று நடைபெறவுள்ள 2-வது சிறப்பு முகாம் குறித்து பொதுமக்களுக்கு விழிப்புணர்வு ஏற்படுத்திட வேண்டுமெனவும் அலுவலர்களுக்கு அறிவுறுத்தினார்.
ஆய்வின் போது ராமநாதபுரம் வருவாய் கோட்டாட்சியர் ராம்பிரதீபன், செய்தி மக்கள் தொடர்பு அலுவலர் அண்ணாதுரை, வட்டாட்சியர்கள் மாரி (ராமநாதபுரம்), இளங் கோவன் (கீழக்கரை) உட்பட அரசு அலுவலர்கள் உட னிருந்தனர்.
