மணல்மேடு:
மணல்மேடு அருகே காருகுடி மெயின்ரோடு பகுதியை சேர்ந்த செல்வம் மகன் ராஜதுரை (வயது 21). இவரது நண்பர்கள் கடலங்குடி அரண்மனை தெருவை சேர்ந்த முருகன் மகன் அருண்பாண்டியன் (25), அதே பகுதியை சேர்ந்த காளிதாஸ் மகன் விஜய் (17). இவர்கள் 3 பேரும் நேற்று மாலை ஒரு மோட்டார் சைக்கிளில் காருகுடியில் இருந்து கடலங்குடி நோக்கி சென்று கொண்டிருந்தனர். மோட்டார் சைக்கிளை அருண்பாண்டியன் ஓட்டினார்.
கடலங்குடியில் உள்ள அரசு நேரடி நெல்கொள்முதல் நிலையம் அருகே ஒரு வளைவில் சென்றபோது கட்டுப்பாட்டை இழந்த மோட்டார் சைக்கிள் அந்த பகுதியில் இருந்த மின்கம்பத்தின் மீது மோதியது.
இதில் படுகாயம் அடைந்த ராஜதுரை, அருண்பாண்டியன், விஜய் ஆகிய 3 பேரையும் அருகில் இருந்தவர்கள் மீட்டு சிகிச்சைக்காக மயிலாடுதுறை அரசு மருத்துவமனையில் சேர்த்தனர். பின்னர் மேல்சிகிச்சைக்காக ராஜதுரை, அருண்பாண்டியன் ஆகிய 2 பேரும் திருவாரூர் அரசு மருத்துவ கல்லூரி மருத்துவமனைக்கு அனுப்பி வைக்கப்பட்டனர். ஆனால் செல்லும் வழியிலேயே ராஜதுரை பரிதாபமாக இறந்தார். இதுகுறித்து மணல்மேடு போலீசார் விசாரணை நடத்தி வருகின்றனர்.
