சாம்சங் நோட்புக் 9 வரிசையில் அப்டேட்களுடன் புதிய மாடல்கள் அறிமுகம்

புதுடெல்லி:

2016 ஆம் ஆண்டின் துவக்கத்தில் நடைபெற்ற நுகர்வோர் மின்சாதன விழாவில் சாம்சங் நிறுவனம் அறிமுகம் செய்த நோட்புக் 9 மாடல்கள் 13.3 இன்ச் மற்றும் 15 இன்ச் டிஸ்ப்ளே கொண்டிருந்தன. இவை மெல்லியதாகவும், எடை குறைவாக, எங்கும் எடுத்து செல்லக் கூடிய வகையிலும் வடிவமைக்கப்பட்டிருந்ததால் அதிக பிரபலமானது. 

இந்நிலையில் சாம்சங் நோட்புக் 9 மாடல்களை அந்நிறுவனம் அப்டேட் செய்து புதிய மாடல்களை அறிமுகம் செய்திருக்கின்றது. மெல்லிய பெஸல் வடிவமைப்பு மற்றும் கைரேகை ஸ்கேனர், விண்டோஸ் ஹல்லோ போன்ற அம்சங்களுடன் புதிய நோட்புக் கிடைக்கிறது. விண்டோஸ் ஹல்லோ அம்சத்தின் மூலம் ஒற்றை கிளிக் மூலம் லாக் இன் செய்யலாம். இதுவரை கடவுச்சொல் பதிவு செய்து அதன் பின் லாக் இன் செய்யும் வழக்கம் இருந்து வருகிறது. 

சிறப்பம்சங்களை பொருத்த வரை 15 இன்ச் நோட்புக் 9இல் 7th Gen Intel Core i7 பிராசஸர், 15 இன்ச் 1080x1920 பிக்சல் ரெசல்யூஷன் கொண்ட ஃபுல் எச்டி டிஸ்ப்ளே, 4GB / 8GB ரேம், 256GB SSD மற்றும் கேமரா வழங்கப்பட்டுள்ளது. கனெக்டிவிட்டி ஆப்ஷன்களை பொருத்த வரை யுஎஸ்பி டைப்-சி போர்ட், எச்டிஎம்ஐ, யுஎஸ்பி 3.0, ப்ளூடூத் 4.1, வைபை உள்ளிட்டவை வழங்கப்பட்டுள்ளன. 

15 இன்ச் மாடல் நோட்புக்கில் 15 மணி நேர பேட்டரி பேக்கப் மற்றும் ஃபாஸ்ட் சார்ஜிங் அம்சம் வழங்கப்பட்டிருக்கிறது. இந்த தொழில்நுட்பம் மூலம் வெறும் 20 நிமிடங்களில் லேப்டாப்பினை முழுமையாக சார்ஜ் செய்திட முடியும். 13 இன்ச் நோட்புக் 9 சாதனத்திலும் கிட்டத்தட்ட ஒரே மாதிரியான சிறப்பம்சங்கள் வழங்கப்பட்டுள்ளன, இதில் 7th Gen Intel Core i5 பிராசஸர் மட்டும் வித்தியாசமாக வழங்கப்பட்டுள்ளது குறிப்பிடத்தக்கது.