ஹீரோ மோட்டோகார்ப் நிறுவனத்தின் எக்ஸ்ட்ரீம் 200ஆர் மோட்டார்சைக்கிள் இந்திய சந்தையில் சமீபத்தில் அறிமுகம் செய்யப்பட்டது.
முன்னதாக ஹீரோ மோட்டோகார்ப் வலைத்தளத்தில் எக்ஸ்ட்ரீம் 200ஆர் விலை ரூ.88,000 (எக்ஸ்-ஷோரூம்) என நிர்ணயம் செய்யப்பட்டு இருந்த நிலையில், இதன் விலை தற்சமயம் மாற்றப்பட்டுள்ளது. அதன்படி எக்ஸ்ட்ரீம் 200ஆர் விலை ரூ.1,900 அதிகரிக்கப்பட்டு தற்சமயம் ரூ.89,900 என மாற்றப்பட்டுள்ளது.
புதிய எக்ஸ்ட்ரீம் 200R மாடலில் 200சிசி ஏர்-கூல்டு இன்ஜின் வழங்கப்பட்டுள்ளது. இந்த இன்ஜின் 18.1 பி.ஹெச்.பி. @8500 ஆர்.பி.எம். பவர் மற்றும் 17.2 என்.எம். டார்கியூ @6000 ஆர்.பி.எம். மற்றும் 5-ஸ்பீடு கியர்பாக்ஸ் கொண்டிருக்கிறது. இந்த இன்ஜினில் பேலென்சர் ஷாஃப்ட் வழங்கப்பட்டிருப்பதால், அதிர்வுகளை குறைத்து, பின்புற சக்கரத்திற்கு அதிக திறனை அனுப்புகிறது.
ஹீரோ எக்ஸ்ட்ரீம் 200R லிட்டருக்கு 39.9 கிலோமீட்டர் வரை செல்லும் என தெரிவிக்கப்பட்டு இருக்கிறது. ஹீரோ எக்ஸ்ட்ரீம் 200R டைமண்டு ஃபிரேம் சேசிஸ், முன்பக்கம் 37 மில்லிமீட்டர் டெலிஸ்கோபிக் ஃபோர்க், பின்புறம் மோனோஷாக் வழங்கப்பட்டிருக்கிறது. இத்துடன் முன்பக்கம் 276 மில்லிமீட்டர் ஒற்றை டிஸ்க் பிரேக், பின்புறம் 220 மில்லிமீட்டர் டிஸ்க் பிரேக் வழங்கப்பட்டிருக்கிறது.
இந்தியாவில் டி.வி.எஸ். அபாச்சி RTR 200 4v மற்றும் பஜாஜ் பல்சர் 200NS விலை ரூ.1 லட்சத்திற்கும் அதிகமாகவே நிர்ணயம் செய்யப்பட்டுள்ளது. அந்த வகையில் விலை அடிப்படையில் ஹீரோ மோட்டோகார்ப் விற்பனை மற்ற மாடல்களுக்கு கடும் போட்டியை ஏற்படுத்தலாம் என எதிர்பார்க்கலாம்.
