ஆற்றுக்கால் பகவதி அம்மன் கோவில் அறக்கட்டளை தலைவர் சசிதரன் நாயர் திருவனந்தபுரத்தில் நிருபர்களிடம் கூறியதாவது;-
பெண்களின் சபரிமலையான ஆற்றுக்கால் பகவதி அம்மன் கோவிலில் கடந்த 2009-ம் ஆண்டு நடந்த பொங்கல் விழாவில் ஒரே நேரத்தில் 25 லட்சத்துக்கும் அதிகமான பெண்கள் ஒன்றுகூடி பொங்கலிட்டு கின்னஸ் சாதனை படைத்தனர்.இந்த ஆண்டு பொங்கல் விழா 12-ந் தேதி தொடங்குகிறது. அன்று இரவு 10.20 மணிக்கு அம்மனுக்கு காப்பு கட்டி குடியமர்த்தி நிகழ்ச்சி நடக்கிறது.
விழா நாட்களில் தினமும் காலை 4.30 மணிக்கு நடை திறக்கப்பட்டு பள்ளி உணர்த்தல், நிர்மால்ய தரிசனம் உட்பட பல்வேறு பூஜைகள் நடத்தப்பட்டு இரவு 1 மணிக்கு நடை அடைக்கப்படும். விழாவையொட்டி சிறுவர்களுக்கான குத்தியோட்ட நேர்ச்சை வழிபாடு மற்றும் சிறுமிகளுக்கான தாலப்பொலி நேர்ச்சை நடக்கிறது.
குத்தியோட்ட சிறுவர்கள் 14-ந் தேதி முதல் தங்களது விரதத்தை மேற்கொள்வார்கள். குத்தியோட்ட விரதத்தில் 12 வயதுக்கு உட்பட்ட சிறுவர்களும். தாலப்பொலி நேர்ச்சையில் 10 வயதுக்கு உட்பட்ட சிறுமிகளும் கலந்து கொள்ளலாம். 9-ம் நாளன்று பொங்கல் வழிபாடு தினத்தில் அன்றைய தினம் இரவு மணக்காடு சாஸ்தா கோவில் நோக்கி அம்மன் பவனி நடக்கிறது.
பிரசித்தி பெற்ற பொங்கல் வழிபாடு 20-ந் தேதி நடக்கிறது. அன்றைய தினம் காலை 10.15 மணிக்கு பொங்கல் வழிபாடு தொடங்கும். பிற்பகல் 2.15 மணிக்கு பொங்கல் நிவேத்தியம் நடக்கிறது. 21-ந் தேதி இரவு குருதி தர்ப்பனம் நிகழ்ச்சியுடன் விழா நிறைவு பெறும்.
விழாவையொட்டி 12-ந் தேதி மாலை 6.30 மணிக்கு நடைபெறும் கலை நிகழ்ச்சிகளை நடிகர் மம்முட்டி குத்துவிளக்கேற்றி தொடங்கி வைக்கிறார். ஆற்றுக்கால் பகவதி அம்மன் கோவில் அறக்கட்டளை சார்பில் வழங்கப்படும் ஆற்றுக்கால் அம்பா விருது பத்மஸ்ரீ.எம்.ஆர் ராஜகோபாலுக்கு இந்த ஆண்டு வழங்கப்படுகிறது.
இவ்வாறு அவர் கூறினார்.
