கோட்டார் சவேரியார் பேராலய 9-ம் நாள் திருவிழா

நாகர்கோவில் கோட்டாரில் உள்ள புனித சவேரியார் பேராலய திருவிழா கடந்த 24-ந் தேதி கொடியேற்றத்துடன் தொடங்கியது. திருவிழா நாட்களில் தினமும் காலை, மாலை வேளைகளில் திருப்பலி மற்றும் ஆடம்பரத்திருப்பலி ஆகியவையும், சிறப்பு ஆராதனைகளும் நடைபெற்று வருகின்றன.

8-ம் நாள் திருவிழாவான நேற்று முன்தினம் இரவு தேர்ப்பவனி நடந்தது. 9-ம் நாள் திருவிழாவான நேற்று மாலை 6.30 மணிக்கு சிறப்பு மாலை ஆராதனை, நற்கருணை ஆசீர் ஆகியவை நடைபெற்றது. இதற்கு கோட்டார் மறைமாவட்ட ஆயர் பீட்டர் ரெமிஜியுஸ் தலைமை தாங்கி மறையுரை ஆற்றினார். அதைத்தொடர்ந்து 2-வது நாளாக நேற்று இரவு 10.30 மணிக்கு தேர்ப்பவனி நடைபெற்றது. மேளதாளங்கள் முழங்கவும், பேண்டு வாத்தியங்கள் இசைக்கவும் அலங்கரிக்கப்பட்ட தேர்கள் வலம் வந்தது. முதலில் மிக்கேல் ஆண்டவர், அதையடுத்து செபஸ்தியார், அதன்பிறகு புனித சவேரியார், மாதா சொரூபங்கள் தாங்கிய தேர் ஒன்றன்பின் ஒன்றாக சென்றன.

அப்போது அங்கு கூடியிருந்த பக்தர்கள் உப்பு, நல்லமிளகு, மெழுகுவர்த்தி, மலர் மாலைகள் போன்றவற்றை காணிக்கையாக வழங்கி தேர்களில் இருந்த புனிதர்களை வணங்கி வழிபட்டனர். தேர்களுக்கு பின்னால் ஏராளமான சிறுவர்- சிறுமிகள், ஆண்கள், பெண்கள் என வரிசையாக நின்று தரையில் விழுந்து, எழுந்து கும்பிடு நமஸ்காரமும், தரையில் உருண்டு வேண்டியும் தங்களது நேர்ச்சையை நிறைவேற்றினர்.

10-ம் நாள் திருவிழாவான இன்று (சனிக்கிழமை) காலை 6 மணிக்கு புனித சவேரியார் பேராலய பெருவிழா திருப்பலி ஆயர் பீட்டர் ரெமிஜியுஸ் தலைமையில் நடைபெறுகிறது. அதைத்தொடர்ந்து காலை 8 மணிக்கு மலையாள திருப்பலியும், 10 மணிக்கு தமிழில் திருப்பலியும், 11 மணிக்கு தேர்ப்பவனியும், இரவு 7 மணிக்கு தேரில் திருப்பலியும் நடைபெறுகிறது. திருவிழாவையொட்டி சவேரியார் பேராலயம் வண்ண வண்ண மின்விளக்குகள் மற்றும் சீரியல் விளக்குளால் அலங்கரிக்கப்பட்டுள்ளது. 10-ம் நாள் திருவிழாவான இன்று குமரி மாவட்டத்துக்கு உள்ளூர் விடுமுறை அளிக்கப்பட்டுள்ளது.