தமிழ் பட உலகின் துணிச்சல் மிகுந்த கதாநாயகிகளில் வரலட்சுமி சரத்குமாரும் ஒருவர். இவர் நடித்திருக்கும் ஒரு புதிய படத்துக்கு, ‘சேஸிங்’ என்று பெயர் சூட்டப்பட்டு இருக்கிறது. மதியழகன் முனியாண்டி தயாரிக்கிறார். பாலசரவணன், இமான் அண்ணாச்சி, சூப்பர் சுப்பராயன், சோனா, யமுனா ஆகியோருடன் வரலட்சுமி சரத்குமார், போலீஸ் அதிகாரியாக நடித்து இருக்கிறார். கே.வீரகுமார் இயக்கி உள்ள இப்படத்திற்கு பாலசுப்ரமணியெம் ஒளிப்பதிவு செய்துள்ளார். தாசி இசையமைத்துள்ளார். பாலசரவணன், இமான் அண்ணாச்சி ஆகியோர் முக்கிய கதாபாத்திரத்தில் நடித்துள்ளனர்.
படத்தை பற்றி இயக்குனர் கே.வீரகுமார் கூறியதாவது: “இது, அதிரடியான சண்டை காட்சிகள் நிறைந்த படம். சண்டை காட்சிகளில் வரலட்சுமி ‘டூப்’ போடாமல் நடித்தார். படுபயங்கரமான ‘கார் துரத்தல்’ காட்சியை மலேசியாவில் படமாக்கினோம். அந்த காட்சியிலும் துணிச்சலாக வரலட்சுமி நடித்துள்ளார்.
சண்டை காட்சிகளையும், கார் துரத்தல் காட்சியையும் பிரபல ஸ்டண்ட் மாஸ்டர் சூப்பர் சுப்பராயன் படமாக்கினார். படத்தில் இடம்பெறும் 70 சதவீத காட்சிகள், மலேசியாவில் படமாக்கப்பட்டன. கதைக்கு தேவைப்பட்டதால், மலேசியாவில் படப்பிடிப்பை நடத்தினோம்.
இது, திகிலான கதையம்சம் கொண்ட படம். பெண்களை கடத்தி ஆசைகளை தீர்த்துக் கொண்டபின் கொலை செய்கிறது, ஒரு கும்பல். இளைஞர்களுக்கு போதை மருந்து கொடுத்து அடிமையாக்குகிறார்கள். அவனை பிடிக்க துப்பறிகிறார், வரலட்சுமி. அப்போது சிலர் கொலை செய்யப்படுகிறார்கள். கொலையாளி யார், அவன் கொலை குற்றங்களில் ஈடுபடுவது ஏன்? என்பதே கதை.”
