சின்னத்திரையில் இருந்து பெரிய திரைக்கு வந்தவர் லோகேஷ் பாப். தொலைக்காட்சி ஒன்றில் நிகழ்ச்சி தொகுப்பாளராக பணியாற்றிய இவர், காமெடி ஷோக்களிலும் பங்கேற்று வந்தார்.
விக்னேஷ் சிவன் இயக்கத்தில் விஜய் சேதுபதி, நயன்தாரா நடிப்பில் வெளியான நானும் ரவுடி தான் படத்தில் நடித்திருந்தார். அவர் நடித்த கதாபாத்திரம் ரசிகர்கள் மத்தியில் நல்ல வரவேற்பை பெற்றது. ஒரு சில படங்களில் நடித்து வரும் லோகேஷுக்கு தற்போது பக்கவாதம் ஏற்பட்டு மருத்துவமனையில் அனுமதிக்கப்பட்டிருப்பதாக செய்திகள் வெளியாகியுள்ளன.
மேலும் லோகேஷின் இடது கை மற்றும் இடது கால் செயலிழந்து உள்ளதாக செய்திகள் வெளியாகி உள்ளன. தற்போது மருத்துவமனையில் இவருக்கு தீவிர சிகிச்சை அளிக்கப்பட்டு வருவதாகவும் பண உதவி தேவை என்றும் கூறப்பட்டது.
இதுகுறித்து விசாரித்த போது, லோகேஷுக்கு உடல் நிலை பாதிக்கப்பட்டது உண்மைதான். ஆனால், இடது கை மற்றும் இடது கால் செயலிழந்ததாக வந்த செய்தியில் உண்மை இல்லை. தற்போது உடல்நிலையில் முன்னேற்றம் ஏற்பட்டு இருப்பதாகவும் விரைவில் குணமடைந்து வீடு திரும்புவார் என்றும் அவரது நண்பர் தெரிவித்துள்ளார். மேலும் தவறான செய்திகளை பரப்ப வேண்டாம் என்றும் அவர் கூறினார்.
