டிவிஎஸ் நிறுவனம் தனது எலெக்ட்ரிக் வாகனங்கள் எண்ணிக்கையை அதிகப்படுத்தும் முயற்சியில் ஈடுபட்டு வருகிறது. இதனை உறுதிப்படுத்தும் வகையில் எலெக்ட்ரிக் XL மொபெட் மாடல் காப்புரிமை படங்கள் இணையத்தில் வெளியாகி உள்ளது. தற்போது டிவிஎஸ் நிறுவனம் ஐகியூப் மாடலை மட்டுமே எலெக்ட்ரிக் பிரிவில் விற்பனை செய்து வருகிறது.
இவைதவிர டிவிஎஸ் நிறுவனம் க்ரியான் எலெக்ட்ரிக் ஸ்கூட்டரையும் இந்திய சந்தையில் அறிமுகம் செய்ய இருப்பதாக தகவல் வெளியாகி உள்ளது. இந்த மாடல் ஆகஸ்ட் மாதத்திலேயே அறிமுகம் செய்யப்படலாம் என்று தெரிகிறது. தற்போது XL எலெக்ட்ரிக் மாடல் விவரங்கள் வெளியாகி இருப்பதை அடுத்து டிவிஎஸ் நிறுவனம் மேலும் பல எலெக்ட்ரிக் வாகனங்களை அறிமுகம் செய்யும் என்று எதிர்பார்க்கலாம்.
தோற்றத்தில் இந்த மாடல் அதன் பெட்ரோல் வெர்ஷனை போன்றே காட்சியளிக்கிறது. இதன் பிரேம், வட்ட வடிவம் கொண்ட ஹெட்லைட், டியுபுலர் கிராப்-ரெயில் உள்ளிட்டவை XL மாடலில் இருப்பதை போன்றே வழங்கப்படும் என்று தெரியவந்துள்ளது. ஹார்டுவேர் அம்சங்களை பொருத்தவரை முன்புறம் டெலிஸ்கோபிக் ஃபோர்க்குகள், பின்புறம் டூயல் ஸ்ப்ரிங்குகள் உள்ளன.
தற்போதைய டிவிஎஸ் XL மாடலில் 99.7சிசி, சிங்கில் சிலின்டர், ஏர் கூல்டு என்ஜின் வழங்கப்பட்டு இருக்கிறது. இந்த என்ஜின் 4.3 ஹெச்பி பவர், 6.5 நியூட்டன் மீட்டர் டார்க் இழுவிசையை வெளிப்படுத்தும் திறன் கொண்டிருக்கிறது. இந்த மொபெட் மாடல் 86 கிலோ எடை கொண்டிருக்கிறது.
Photo Courtesy: Bikewale
